“Barselona” ilə “Nike” arasında soyuqluq yaranıb.

"Football-plus.az" xəbər verir ki, ABŞ şirkəti texniki sponsoru olduğu klubun hələ də yeni formanı mövsümün rəsmi oyununda təqdim edə bilməməsindən narazıdı.

Bu barədə sport.es saytı məlumat yayıb. La Liqa kataloniyalılara “Malyorka” (3:0) və “Levante” (3:2) ilə oyunlarda üç yeni forma variantından birini geyməyə icazə verməyib. Səbəb isə həmin dəstlərin hər iki rəqibin ev forması ilə oxşarlığı olub. Buna görə də “Barselona”nın oyunçuları meydana 2024/25 mövsümünün forması ilə çıxmalı olublar.

Belə vəziyyət “Nike” rəhbərliyini ciddi şəkildə qəzəbləndirib. Lakin şirkət bunun günahının klubda olmadığını anlayır. “Barselona”nın yeni ev formasını növbəti turun “Rayo Valyekano” ilə matçında təqdim edəcəyi gözlənilir. Klubun artıq liqadan razılıq aldığı vurğulanır.