"Şamaxı" Misli premyer-liqasının 3-cü tur matçında "Sumqayıt"ın meydanından heç-heçə ilə ayrıldı - 1:1

"Football-plus.az" xəbər verir ki, "şirlər"in baş məşqçisi Ayxan Abbasov oyunsonrası mətbuat konfransında jurnalistlərin suallarını cavabladı.

- Gərgin oyun olacağı bilinirdi. "Sumqayıt" çempionata çox yaxşı başlayıb. "Qarabağ"a qalib gələndən sonra çox inamlı olacaqları bəlliydi. Biz də xal qazanmaq istəyirdik. Öz qapımıza qol vurandan sonra futbolçuların özünü itirməməsi məni sevindirdi. Hesab 1:1 olandan sonra ən təhıükəli epizodlar bizdə oldu. Hər iki komanda bir xala layiq idi. Milli fasilə olacaq. Daha yaxşı olmalıyıq. Əlimizdə olan futbolçularla mübarizə aparacağıq.

- Qarşıda U-21 millisinin rəsmi oyunları gəlir. Komandanı hazırlamaq çətin deyil?
- Millidə tək deyiləm. Köməkçilərimlə birlikdə çalışırıq. Portuqaliya və Bolqarıstan millilərini təhlil etmişik. Bu, özümüz üçün də yenilikdi. Böyük təcrübədi. Ümid edirəm ki, üzüağ çıxarıq.

- İki hücumçulu sistemə keçəndən sonra qol epizodları yaratdız. Qarşıdakı matçlarda bundan istifadə edəcəksiz?
- İki hücumçu ilə oynamağı sevirəm. Yoxlama oyunlarında da bunu sınamışıq. Belə gedişlər olacaq.

- Edqar Adilxanov qol vurdu. Bu, onun əvvəlki formasına qayıtmasına təkan olacaq?
- "Sabah"la matçda ondan razı qalmışdım. Gənc oyunçularda sabitlik həmişə olmur. Hər şey nəzarətimizdədi. Edqarın böyük potensialı var. Onun gələcəkdə daha yaxşı olacağına inanırıq.