"Şamaxı" Misli premyer-liqasının 30-cu tur matçında "Sumqayıt"ın meydanından qalib ayrıldı - 2:1.

"Football-plus.az" xəbər verir ki, "şirlər"in baş məşqçisi Ayxan Abbasov oyunsonrası mətbuat konfransında jurnalistlərin suallarını cavabladı.

- Maraqlı oyun oldu. Belə stadionda meydana çıxmaq xoşdu. Əsl futbol ab-habası var idi. Hər iki komandanın azarkeşlərinə təşəkkür edirəm. Önəmli qələbə qazandıq. Hər iki hissədə üstün oynadıq. Futbolçularım qol buraxsa da, oyundan qopmadı. İkinci yarıda ardıcıl qollar vurduq. Rəqib yaxşı təzyiq göstərdi. Rəhbərliyi təbrik edirəm. Qarşımıza qoyulan məqsəd üçün çalışırıq. Bu gün qalib gələcəyimizə, gənc futbolçuların yaxşı oynayacağına inanırdım. Qarşıda bizi daha çətin oyunlar gözləyir.

- Fasilədə nə dəyişdiz?
- Futbolçularımdan tempi yüksək tutmağı tələb etdim. "Sumqayıt" buna imkan vermək istəmirdi. İkinci hissədə istəyimizə nail olduq.

- "Şamaxı" premyer-liqada qalmağı böyük ölçüdə təmin etdi. Bundan sonra əsas rəqibləriniz "Neftçi" və "Sabah" ola bilərmi?
- Hər şey ola bilər. Biz də daha yüksək pillələrdə qərarlaşmaq istəyirik. Dayanmaq olmaz. İnkişaf etmək istəyiriksə, daha yaxşısına nail olmalıyıq. Gələcəyimizi düşünməliyik. Motivasiyalıyıq.

- Növbəti mövsümdən AFFA-nın premyer-liqa klublarına ayıracağı büdcə 3 milyon yox, 2,5 milyon manat ola bilər. Bu qərar "Şamaxı"nın planlarına necə təsir edəcək?
- "Şamaxı" premyer-liqanın yeganə sponsorsuz komandasıdı. 1-ci liqadan gələcək "Qəbələ"nin, gəlmək ehtimalı olan "İmişli"nin də sponsoru var. Təbii ki, klub sayı çoxdusa, hamısı avrokuboklar uğrunda mübarizə aparmayacaq. Bizim öz hədəflərimiz var. Gənc futbolçuları Azərbaycan futboluna qazandırmaq istəyirik. Bu haqda klub rəhbərliyiylə müzakirə aparmışıq. Hansısa yerli oyunçu 3-5 dəqiqə oynamaqla inkişaf edə bilməz. Mövqelərdə yerli oyunçular arasında rəqabət yaratmaq istəyirik. O bəllidi ki, bu qərar ən böyük zərbəni "Şamaxı"ya vuracaq.

KƏNAN BAHADIR