Başqasını pulunu saymaq heç də yaxşı əlamət deyil. Hətta bununla bağlı maraqlı lətifə də var. Ancaq uğurun həcmi, əzəməti böyük olanda, sənin ölkənin klubu həmin uğurun hesabına az qala illik büdcəsini təmin edəndə saymaq da olar, sevinmək də!

Beləliklə, “Qarabağ” Çempionlar Liqasının əsas mərhələsinə vəsiqə qazanmaqla 18 milyon 620 min avro (37 milyon manata yaxın) qazancı təmin edib. Ağdamlılar əsas mərhələnin bütün oyunlarında uduzsalar belə, onların hesabına pul əlavə olunacaq.

Belə ki, UEFA həmin mərhələdə 36-cı yeri tutana 275 min, 35-ci yeri tutana 550 min avro ayırır. Hələ klub teleyayın hüququnun satışından da ən azı 700 min avro qazanacaq.

Nəhayət, onu da xatırladaq ki, əsas mərhələdə hər qələbə üçün 2,1 milyon, hər heçə-heçə üçün 700 min avro verilir. Bir sözlə, “Qarabağ”ın artıq 20 milyon avrosu hazırdı, amma bu məbləğ 25 milyona çatsa belə, heç kim təəccüblənməz. Halal xoşları olsun!

MÜZƏFFƏR QULUZADƏ