MBA komandalarından “Çikaqo” Derrik Rouzun uzun müddət geydiyi bir nömrəli formanı istifadədən çıxaracaq. Bununla bağlı xəbəri “öküzlər”in mətbuat xidməti yayıb. Təntənəli mərasim gələn il yanvarın 24-də - “Boston”la müntəzəm çempionatın oyunundan sonra keçiriləcək.

Xatırladaq ki, “Çikaqo” Rouzu MBA-nın 2008-ci ildəki draftında 1 nömrə altında seçib. O, MBA-da ilin debütantı, 2011-ci ildə isə ən dəyərli oyunçu (MVP) sayılıb. 2010-12-ci illər aralığında üç dəfə Ulduzların oyununda iştirak edib. 2008-16-cı illərdə “Çikaqo”nun şərəfini qoruyub, oyunçu karyerasını ötən il “Memfis”də bitirib.

Bu arada “The Atletic”in basketbol icmalçısı Devid Oldric mövsümlərarası fasilədə görülən iş əsasında MBA klublarının reytinqini açıqlayıb. O, reytinqi hazırlayarkən klubların draftdakı seçimlərini, dəyiş-düyüşlərini və bağladığı müqavilələri də nəzərə alıb.

Oldricin fikrincə, mövsümlərarası dövrün ən fəal 10 klubu bunlardı: “Hyuston”, “Atlanta”, “Denver”, “Memfis”, “San-Antonio”, “Şarlott”, “Dallas”, “Oklahoma-Siti”, “Orlando”, “Klippers”.