"Qarabağ" Misli premyer-liqasının 2-ci tur matçında evdə "Sumqayıt"a uduzdu - 0:1.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Rəqibi təbrik edirəm. İki oyuna 6 xal toplayıblar. Çox yaxşı başlanğıcdı. Oyun haqda deyəcək çox söz yoxdu. Futbolçularımı anlayıram. Meydana az şans qazananlar çıxsa dax yorğunluq hiss olunurdu. Bu məğlubiyyətin bizə çox faydası olacaq. Qarşıda bizi bundan da sıx qrafik gözləyir. Futbolçular da bunu anlayacaq. Uğur əldə edəndə, komandanın loru dildə desək, burun yuxarı qalxır... Bu gün 3 xal rəqibin haqqı idi. İmkanlarımız var idi. Top qapıdan keçməli idi, ancaq keçmədi. Məncə, yaxşı başlanğıc oldu.

- Nəriman start heyətində yox idi. Riskə atmaq istəmədiz?
- Bəli. Həm də zədəsi var idi. 2-3 gündü ki, müalicə olunur. Məşqdə də iştirak etməyib.

- Juninyonun icarəyə götürülməsi haqda xəbərlər doğrudu?
- Xeyr. Məndə belə məlumat yoxdu. Danışıq aparmamışıq. Yəqin ki, komandasında şans qazanmadığına görə belə fikirlər ortaya çıxıb.

- Meydana ikinci heyətlə çıxdığınız üçün uduzduğunuzu düşünürsüz?
- Xeyr. Bəlkə əsas heyətlə oynasaq, yenə uduzacaqdıq. İki gün əvvəl oynamışıq. Yol yorğunluğu da var idi.

- Hazırda heyətdə 15 legioner var. Növbəti əcnəbi futbolçu transferləri üçün 200 min manat ödəməli olacaqsız. Yeni oyunçular alınacaq?
- Almağa çalışırıq. 200 min manat məsələsinə görə, nə edə bilərik? Başqa çıxış yolumuz yoxdu. Keyfiyyətli iş görmək istəyiriksə, bu addımlar atılmalıdı.

- "Qarabağ"ın qol buraxdığı epizodda Şahruddinin səhvi var idi. Abbas da ona etiraz etdi. Dedi ki, yumruqlarınla çıxara bilərdin...
- Bir az kuryoz qol alındı. Abbas öz işi ilə məşğul olsa, yaxşıdı. Qapıçı topu başı ilə çıxarası deyil ki... Hərə öz işi ilə məşğul olmalıdı. İşini düzgün görmək hamının borcudu.

- Son 3 mövsümün ilk turunda 0:1 hesabıyla uduzmusuz. Təsadüfdü, yoxsa hələ premyer-liqaya köklənməmisiz?
- Bu, ikinci turdu (gülür). Motivasiyamız çatışmırdı. Həm də yorğun idik. Bu gün yox, sabah da oynaya bilərdik... Əsas odu ki, sonu yaxşı olsun...

- "Ferentsvaroş"un baş məşqçiləri və futbolçuları qıcıqlandırıcı açıqlamalar verib. Bu, sizin üçün əlavə motivasiya mənbəyi ola bilər?
- Normal haldı. Qarşıdakı oyuna köklənmək üçün taktiki gedişdi. Amma belə şeylərə fikir versək, öz oyunumuzu itirərik. Bütün matçlara ciddi və təmkinlə hazırlaşmalıyıq. İndi futbolda bir və ya iki top fərqi ciddi üstünlük deyil.

- Düzdü, hələ cavab matçı var. Lakin Çempionlar Liqasının əsas mərhələsinə vəsiqə qazansaz, hansı stadionda oynayacaqsız?
- Gəlin, hamımız cavab oyunu haqda düşünək. Birlikdə hazırlaşaq. Sanki məndən başqa hamı "Ferentsvaroş"u keçdiyimizi düşünür. Sevindirici haldı. Bu, bizə inamın nəticəsidi. Ancaq həm də bizə mane ola bilər. Rəqib "Ferentsvaroş"du. Heç nədən qol vura bilirlər. Üstün cəhətləri çoxdu. Səhvsiz oynamalıyıq.

KƏNAN BAHADIR