"Qarabağ" ölkə kubokunun yarımfinal mərhələsinin cavab oyununda "Araz-Naxçıvan”ı darmadağın etdi - 3:0.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Futbolçularımı təbrik edirəm. Bir az gərginlik var idi. Sona qədər təmkinli oyun keçirdilər. Rəqibin səhv etməsini gözlədilər. Elmara və komandasına uğurlar arzulayıram.

- Fərqli iki hissə izlədik. İlk yarıda futbolçuların oyununun alınmaması nə ilə bağlı idi?
- Öncə rəqibin oyununu dəyərləndirmək lazımdı. Onlar ağıllı müdafiə olunurdu. Rəqibin qol epizodları oldu. İkinci yarıda bir az təzyiqi qaldırdıq və bundan istifadə etdik. Kubok oyunları çempionat matçlarından fərqlidi. Kubok əldə edəndə qalan komandalar daha diqqətli olurlar. Bu normaldı. Bu cür hissələrə daim hazır olmalıyıq.

- Finalda hansı komanda sizin üçün arzuolunandı?
- Finalda nəticəyə alışıb-yanan rəqib olacaq. Avrokuboklarda iştirak etmək şansı olacaq. Bizi ağıllı bir oyun gözləyəcək. Son hazırlıqlarını bizə qarşı quracaqlar. Hər ikisi öz komandamızdı. Hər iki komanda böyük sərmayə qoyub. Strukturlarını göstərə bilərik. “Neftçi”nin gözəl bazası var. “Sabah” Şüvəlanda yer götürüb, futbolçular üçün yaxşı şərait yaradıb. Hər iki komandanın avrokuboklarda iştirak etməyini istəyərəm. Bizim də finalda məğlub olmaq kimi düşüncəmiz olmayacaq. Futbolçuların titul sayının artmasını istəyərəm. Futbol ömrü qısadı.

ƏSƏD SEYİDOV