“Piriçin Emillə Rzadan tək üstünlüyü pasportudu”
Qarşısına çempionluq, minimum avrokuboklara vəsiqə hədəfi qoyulan “Neftçi”nin hazırda üç güclü qapıçısı var.
Son iki mövsümü zədə üzündən boşa verən Emil Balayev, gənc, hətta millinin də əsas qapıçısı olan Rza Cəfərov və Türkiyə çempionatından gətirilən Kənan Piriç. Emil və Kənan təcrübəlidi. Amma Rza qədər inam verirlərmi - demək çətindi. Ötən saylarda bu haqda danışmışdıq. İki yerli və səviyyəli qapıçın ola-ola, legioner gətirirsənsə, əsas heyətdə oynatmağa məcbursan. Açığı, heç Emil də Rza səviyyəsində deyil. Amma görünür, Samir Abasovun gözdən çıxardığı qapıçı məhz Rzadı. Cəfərovun cəmi 22 yaşı var, daim əsas heyətdə oynayan vaxtıdı.
Qalmalıdımı, başqa klublardan gələn təklifi qəbul etməlidimi? Ümumiyyətlə, heyətdə üç iddialı qapıçının olması “Neftçi” üçün müsbət amildi, yoxsa mənfi? Bu sualı veteran qapıçılardan Kamal Bayramova ünvanladıq:
“Əlbəttə, hər məşqçinin istəyi əlinin altında keyfiyyətli futbolçuların olmasıdı. Hazırda “Neftçi”də üç iddialı qapıçının olması gərgin rəqabətdən xəbər verir. Bu, klubun qazancıdı. Samir Abasovun fikri burda ən önəmli amillərdəndi. Bu gün ən çox elə Samir Abasov sevinir. Çünki belə qapıçılara sahibdi. Açığını desək, Piriçin Emillə Rzadan tək üstünlüyü pasportudu. Rzanın mümkün gedişinə qalanda məşqçilərin verəcəyi qərar çox önəmlidi. Futbolçu az şans qazanacağını hiss edirsə, mütləq özünü inkişaf etdirə biləcəyi sərfəli ünvan axtarmalıdı. Bu ölkə xaricindən olsa, daha yaxşı olardı. Mən şəxsən Rzanın ehtiyatda qalmasını və bununla barışmasını heç istəmərəm”.
MÜZƏFFƏR QULUZADƏ
Digər xəbərlər
