“Araz-Naxçıvan” Nikosiyada dəstəksiz qalacaq – komanda təzyiqlə üzləşib?
“Araz-Naxçıvan” bu gün Konfrans Liqasının 3-cü təsnifat mərhələsinin cavab oyununda “Omoniya”nın qonağı olacaq. Bilindiyi kimi, Muxtar Respublika təmsilçisi srağagündən bu məqsədlə Cənubi Kiprin Nikosiya şəhərinə yollanıb.
Komandanın son durumu, azərbaycanlı azarkeşlərin matçın keçiriləcəyi GSP stadionunda olub-olmayacağı və kollektivə səfərdə necə münasibət göstərildiyi haqda ətraflı məlumaq almaq üçün klubun mətbuat xidmətinin rəhbəri Mahal Məmmədovla əlaqə saxladıq. Onun “Football-plus.az”a cavabı:
“Komandada hər şey qaydasındadı. Səfərə Bakı – Afina – Larnaka reysiylə gəldik. Sonra avtobusla Nikosiyaya çatdıq. “Hilton” otelində qalırıq. Srağagün və dünən məşq etmişik. Zədəlimiz yoxdu. Bəxtiyar Həsənalızadə vərəqə cəzalısı olduğuna görə bizimlə gəlmədi. Azarkeşlərə gəlincə, klubla kimsə əlaqə saxlamayıb. Başqa maraqlanan da olmayıb. Burda hansısa təzyiqlə, xoş olmayan münasibətlə rastlaşmamışıq. Hər şey yaxşıdı”.
Xatırladaq ki, “Omoniya” – “Araz-Naxçıvan” matçı Bakı vaxtıyla saat 22.00-da başlayacaq. “Qırmızı-ağlar” Bakıda keçirilən ilk oyunda acı məğlubiyyət yaşayıb (0:4).KƏNAN BAHADIR
Digər xəbərlər
