Açıq danışaq: hər kəs “Qarabağ”ın Çempionlar Liqasının pley-offunda “Ferentsvaroş” yox, “Ludoqorets” ilə qarşılaşmasını istəyirdi. Söhbət təkcə Macarıstanın əmsallar cədvəlində Bolqarıstandan 6 pillə irəlidə olmasından getmir. Bu iki komandanı iş başında görmüşük, “Ferentsvaroş” ən müxtəlif keyfiyyətlərə görə “Ludoqorets”dən bir addım öndədi. O başqa məsələ ki, “Ludo” da “Qarabağ”a rəqib olsaydı, işimiz asan olmayacaqdı.

Niyə?

Ona görə ki, ağdamlılar hücumda Nəriman Axundzadə ilə Musa Qurbanlının ümidinə qalıb. Bəli, təsnifat mərhələləri birnəfəsə keçilib – 4 oyuna 4 qələbə, 10 qol. Zahirən bundan gözəl nə ola bilər ki! Amma “Qarabağ”ın Olavio Juninyoya bərabər mərkəz hücumçusu yoxdu. Bu acı reallıq hər kəsi qorxudur, klubun tarixində 2-ci dəfə ÇL-in əsas mərhələsinə bu qədər yaxın olduğunu hiss edən azarkeşləri əndişəyə salır.

Qurban Qurbanovun hücumçu transferi ilə bağlı mövqeyi aydındı. “Şkendiya” ilə oyunöncəsi mətbuat konfransında dedi ki, “Klovis məsələsi çox danışılır, kənardan hər şey rahat görünə bilər, daxildə çox detal var”. İcazə versəz, bu ifadələri belə “tərcümə edərdim”: “Mərkəz hücumçusu almağa pulumuz var, amma çox qazanacaq birinin gəlişi komanda daxilində maaş balansını, deməli, həm də ab-havanı pozacaq”.

Bəli-bəli, “Qarabağ”ın pulu var ki, klub prezidenti Tahir Gözəl “Şkendiya” ilə oyundan sonra məhz bunu dedi:

Ümumiyyətlə, Tahir bəy bu yay çox açıq danışır. Məncə, fərqindədi ki, “Qarabağ” bu il də ÇL-in əsas mərhələsinə qatıla bilməsə, azarkeşlər, futbol ictimaiyyəti Qurban bəylə yanaşı, ondan da hesabat tələb edəcək.

Xatırlayırsızsa, “Şelburn”la oyundan sonra da bu mövzuda maraqlı kazus yaşanmışdı. Tahir Gözəl jurnalistlərə “daha iki transferimiz var - biri hücumçudu, digəri 10 nömrə mövqeyinə. Qurban hoca istəyib, biz də ona dəstək veririk. Qurban hocanı təbrik edirəm” demiş, həmkarlarımız mətbuat konfransında bu məqamı aydınlaşdırmaq istəyəndə baş məşqçi “Tahir Gözəl elə deyib? Yox, transfer etməmişik”, - deyə hər kəsi suallar içində qoymuşdu. Tezliklə aydın oldu ki, doğrudan da, Xonatan Montiel transfer olunub, yəni Gözəl gerçəyi deyirmiş.

Hə, Tahir bəy son büdcə açıqlamasıyla rəngləri bir qədər də aydınlaşdırdı. Klubun rəhbəri ictimaiyyətə onu demək istəyir ki, mən üzərimə düşəni etmişəm, lazımi büdcəni ayırmışam, bundan sonrası, yəni “Qarabağ”ı ÇL-in əsas mərhələsinə daşımaq baş məşqçinin üzərinə düşən işdi. Tahir bəy bilərəkdən və ya bilmədən (mənə elə gəlir ki, ikinci versiya daha uyğundu) Qurban Qurbanovu nişangaha çevirdi.

Mən fikrimi bir qədər də aydın ifadə etmək istəyirəm: “Ferentsvaroş” səddi keçilməsə, məsuliyyət birbaşa Qurban Qurbanovun üzərində olacaq. Gerçək budu! Qurban bəy, ehtiyatlı ol, nişangahdasan!

HUŞƏNG