Son illəri uğursuz keçirən “Beşiktaş” üçün yeni mövsüm də istənilən şəkildə başlamayıb.

"Football-plus.az" xəbər verir ki, komanda “Şaxtyor”la hər iki qarşılaşmada zəif təsir bağışlayaraq fanatlarını məyus etdi. Bu azmış kimi, İstanbul nəhəngi transfer dönəmini də hələlik istənilən səviyyədə keçirmir. “Şaxtyor”la oyunlar göstərdi ki, Yurasek, Orkun Kökçü və Abrahamla ciddi hədəflər uğrunda mübarizə aparmaq çətin olacaq. Üstəlik əsas futbolçular da komandanı tərk edir.

Jedson Fernandeşin “Spartak”a keçmək üzrə olduğunu xəbər vermişdik. Bu transfer artıq rəsmiləşib. Portuqaliyalı ulduz 20,7 milyon avroya Moskva nəhənginə yollanıb və yeni klubu ilə dördillik müqavilə imzalayıb. Müqavilədə şərtə bağlı olan maksimum 7,2 milyon avroluq bonuslar da mövcuddu. Fernandeş “Spartak” tarixinin ən bahalı oyunçusuna çevrildi. “Beşiktaş” isə tarixinin ən bahalı ikinci satışını reallaşdırdı. Komanda yalnız Cenk Tosunu bundan baha qiymətə (22,5 milyon avroya) satmışdı.

Yeri gəlmişkən, bilindiyi kimi, Fernandeşin haqlarının 50 faizi “Benfika”ya məxsus idi. “Beşiktaş” 10 milyon avro qarşılığında Lissabon nəhəngindən həmin 50 faizlik haqqı almağa müvəffəq olub. Ancaq “qartal” bu məbləği “Benfika”ya 5 il ərzində ödəyəcək. “Spartak” isə 20 milyon avronu istanbullulara nəğd verəcək. Bu 20 milyon avronun yeni transferlərə xərclənəcəyi gözlənilir. İddialara görə Fernandeş “ağ-qaralar”da 1,3 milyon avro maaş almasından narazı idi. Yeni klubunda o, 3,5 milyon avro qazanacaq!

Bu arada daha bir futbolçu “Beşiktaş”ı tərk etmək üzrədi. Semih Kılıçsoy İtaliya təmsilçisi “Kalyari” ilə anlaşıb. Bu xəbəri italiyalı jurnalist Canluka Di Martsio hələ iyulun 31-də paylaşmışdı. 19 yaşlı futbolçu son detalları razılaşdırmaq üçün dünən axşam İtaliyaya yollanıb. Türkiyə mənbələrinin iddiasına görə “Beşiktaş” bu satışdan 2 milyon avrosu bonuslarla olmaqla 14 milyon avro qazanacaq. Bundan başqa, Kılıçsoyun sonrakı satışından da istanbullulara 20 faiz pay çatacaq.

Xatırladaq ki, “Beşiktaş”ın öz yetirməsi olan istedadlı futbolçu geridə qoyduğumuz mövsümdə 46 oyunda forma geyərək hesabına 4 qol, 3 məhsuldar ötürmə yazıb. Semihlə Fernandeşdən başqa “Beşiktaş” bu yay Zaynutdinov, Masuaku, İmmobile və Onur Bulut ilə də yolları ayırıb.

“Şaxtyor”la matçlardakı uğursuzluq Sulşerə olan güvəni bir qədər sarsıdıb. Fanatlar arasında yenidən Sərgən Yalçın səsləri yüksəlib. Amma məşqçi dəyişikliyi hələlik rəhbərliyin gündəmində yoxdu. Komandanın mövsümə Sulşerlə başlayacağı dəqiqdi.