“Qarabağ” tezliklə hücum xəttini gücləndirə bilər.

Bu iddia ilə məşhur insayder Lorentso Lepore çıxış edib. O, Ağdam təmsilçisinin xorvatiyalı hücumameyilli yarımmüdafəçi Alen Haliloviçlə maraqlandığını bildirib. Əlavə edib ki, 29 yaşlı futbolçu iki MLS (ABŞ) təmsilçisindən də təklif aldığına görə seçim qarşısındadı.

Bəs adı çəkilən oyunçu “köhlən atlar”ı gücləndirəcək səviyyədədimi? “Football-plus.az” bu suala cavab axtardı.

Haliloviç hazırda “Fortuna Sittard”ın (Niderland) şərəfini qoruyur. Karyerası ərzində İspaniyada “Barselona”nın, İtaliyada “Milan”ın, Almaniyada isə “Hamburq”un uğurları üçün tər töküb. Alen Xorvatiya millisinin heyətində 10 oyunda keçirib. Həmçinin futbolçu bir dəfə İspaniya kubokunu, bir dəfə Xorvatiya superkubokunu başı üzərində qaldırıbsa, ölkəsinin premyer-liqasında iki dəfə çempion olub.

Alenin “transfermarkt”dakı dəyəri 1 milyon avrodu. O, karyerasının ən bahalı dövrünü 2016-cı ildə, 20 yaşında ikən yaşayıb. Həmin vaxt “Barselona”nın şərəfini qoruyan futbolçu 10 milyon avro dəyərində olub.

İş ondadı ki, ötən mövsüm Haliloviç üçün uğurlu keçməyib. Niderland çempionatında 34 matçın 27-də iştirak ərizəsində adı olan oyunçu cəmi 11 görüşdə start heyətində yer alıb. Bu ilin aprelində ayağından ciddi zədə alan Alen “futbol ili”nin son 6 qarşılaşmasını buraxmalı olub. Şans qazandığı matçlarda 1787 dəqiqə forma geyən xorvatiyalı 2 qol, 3 məhsuldar ötürməylə yadda qalıb, 2 sarı vərəqəylə üzləşib. Onun klubla müqavilə müddəti gələn ilin yayında başa çatacaq.

KƏNAN BAHADIR