Mövsümlərarası fasilədə heyətini Dani Bolt, Pedro Bikalyo və Kris Kuaku ilə gücləndirən “Qarabağ” daha bir transferdə uğurlu olub.

“Football-plus.az” xəbər verir ki, bu barədə “TheCroatianLad” nəşri məlumat yayıb. Xorvatiyalı həmkarlarımızın iddiasına inansaq, “köhlən atlar” Sami Mmae ilə bütün məsələlərdə ortaq məxrəcə gəlib.

Mərakeş əsilli belçikalı mərkəz müdafiəçisinin Bakıda olduğu, bu gün tibbi baxışdan keçəndən sonra müqaviləyə qol çəkəcəyi qeyd edilib. O da deyilib ki, Ağdam təmsilçisinin niyyəti oyunçunu icarəyə götürməkdi. Sadəcə, rəsmi anlaşmada satınalma şərti olmayacaq.

Maraq üçün qeyd edək ki, Mmae hazırda Zaqreb “Dinamo”sunun şərəfini qoruyur. Onun Xorvatiya təmsilçisiylə müqaviləsinin müddəti 2028-ci ilin yayında başa çatacaq.

Xatırladaq ki, daha əvvəl saytımızda adı çəkilən futbolçu haqda ətraflı məlumatı dərc etmişik. Həmin yazı ilə burdan tanış ola bilərsiz.

KƏNAN BAHADIR