“Neftçi” ötən mövsüm göstərdiyi nəticə ilə azarkeşlərinə yalnız məyusluq yaşatdı. 6-cı yer nə paytaxt klubunun, nə də baş məşqçi Samir Abasovun ad-sanına yaraşdı.

“Ağ-qaralar” təlim-məşq toplanışının ikinci hissəsinə başlayıb. “Neftçi” hazırlıq dönəmini Polşada davam etdirir. Artıq yoxlama oyunları üçün rəqiblər də bəllidi. “Ağ-qaralar” iyulun 17-də Təl-Əviv “Hapoel”i (İsrail) qarşılaşıb. 22-də “Termalista” (Polşa), 27-də “Asteras” (Yunanıstan), avqustun 1-də isə AEL (Cənubi Kipr) ilə oynayacaq.

Komandanın heyətinin tam formalaşdığını demək olmaz. Hələ də ən azı beş transferə ehtiyac var - mərkəz müdafiəçiləri, sağ cinah müdafiəçisi, sol cinah vingeri və səviyyəli, qol duyumu yüksək olan mərkəz hücumçusu.

Qapıçı transferi də gündəmdədi. Amma iş orasındadı ki, komandanın indiki əsas qapıçısı, yığma üzvü Rza Cəfərov getmədən bu haqda düşünmək yersizdi. Rzanın Buxarest “Dinamo”suna mümkün transferi uzun müddət müzakirə olunsa da, məhz bakılılar yeni və səviyyəli qapıçı tapa bilmədiyinə görə alınmadı.

Ən aktual müzakirə mövzularından biri də Ramil Şeydayevlə bağlıdı. O, ötən mövsüm ümidləri doğrultmadı. Hər kəs Ramilin yeni mövsümə başqa komandada başlayacağını düşünürdü. Amma belə görünür ki, artıq onunla bağlı problem yoxdu. Məşqlərdə kefinin yerində olduğu görünür, komandadaxili oyunlar zamanı Emin Mahmudovla birgə qalib heyətdə yer alır.

"Aö-qaralar” Cordan Rezabala ilə Fredi Varqası transfer edib. Rezabala hamımıza tanışdı. Amma “Sumqayıt”da fərq yaradan futbolçunun “Neftçi”də bunu bacarması mümkünsüzdü. Amma mümkünsüz də deyil. Belə nümunələri çox görmüşük. Son mövsümlərə baxsaq, Georgi Papunaşvili “Kəpəz”də özünü çox yaxşı göstərə bildi və “Zirə”yə transfer olundu. Ötən mövsüm “qartallar”ın da ən yaxşılarından idi.

Hələ ki “Neftçi”nin hazırlıq dönəmini yaxşı keçirdiyini deyə bilərik. Samir Abasov və köməkçiləri mental baxımdan komandanı gələn mövsümə kökləmiş kimi görünür.

Daha bir yeni xəbər “Neftçi”nin qadınlardan ibarət “Bella Çao” fanklubunun yaradılması ilə bağlıdı. Düzdü, “ağ-qaralar”ın oyunlarında həmişə zərif cins nümayəndələrinə rast gəlirik. Ancaq yeni mövsümdən xanımların paytaxt klubuna daha təşkilatlanmış formada, ayrıca güc kimi dəstək verməsi gözlənilir. “Bella Çao”nun yaradıcılarının izinə düşə bilməsək də, yaxın günlərdə bu fanklubla bağlı məlumatı sizə çatdıracağıq.

MÜZƏFFƏR QULUZADƏ