Artıq illərdi formalaşan təsəvvür var: “Real”ı təmsil etmək istənilən futbolçunun karyerasının zirvəsi sayılır.

Bəli, İtaliyada, Almaniyada, İngiltərədə də nəhənglər var, ancaq nədənsə məhz “Santyaqo Bernabeu”ya və “Kamp Nou”ya “köçmək” naminə əksər ulduzlar çox şeydən keçməyə razıdı. Məsələn, Tibo Kurtua kimi hədəfinə çatmaq üçün klubu ilə açıq münaqişəyə gedənlər də var. Bu üzdən “Real”la “Barselona”dan ayrılmağı da çoxları karyerada geriyə addım kimi dəyərləndirir. Hətta sən Madrid klubunda əsas heyətə düşməsən də.

Rodriqo Qoes məhz belə, birmənalı qiymətləndirilməyən vəziyyətə düşüb. O, Madrid klubuna yeniyetmə yaşında qədəm qoyub, 18 yaşı olarkən doğma “Santos”u tərk edib. 5 mövsüm ərzində komandanın liderlərindən birinə çevrilməyi bacarmasa da, rotasiya üçün ən vacib oyunçulardan biri oldu. Bəzən start heyətində yer aldı, bəzən də ilk əvəzedici rolu ilə kifayətləndi. Ancaq indi braziliyalının mövqeyi sürüşkəndi. Komandanın sabiq baş məşqçisi Karlo Ançelotti hələ ötən mövsüm başqalarını (məsələn, Braimi və ya Güləri) Rodriqodan üstün tuturdu, yazdakı “klasiko”da isə ehtiyatda saxlayaraq, meydana debütant Viktor Munyosu buraxmışdı. İtaliyalı mütəxəssis həmin oyundan sonra belə demişdi:

Ancaq maraqlıdı ki, Ançelottu Braziliya yığmasının “sükanı arxasına” keçəndən sonra da Rodriqonu çağırmadı, Antonini seçdi. Bu məqamlar hücumçunun karyerasında heç də yaxşı dönəmin yaşanmadığını açıq işarədi.

Hərçənd bu elə ötən mövsüm də aydın idi. Rodriqo müxtəlif formasiyalarda oyun vaxtı qazanırdı: 4-4-2-də sağ yarımmüdafiəçi, 4-3-1-2-də hücumçu kimi. Ancaq heç bir mövqedə özünü göstərə bilmədi.

Nəticə yaxşı deyil – bütün turnirlərdə 3,5 min oyun dəqiqəsi ərzində 14 qol və 11 məhsuldar ötürmə. İflas olmasa da, gözləntilərin altında qalan nəticədi. Xüsusən də yaz dönəmi braziliyalı üçün uğursuz keçdi – Rodriqo La Liqada sonuncu məhsuldar hərəkəti yanvarın 25-də etdi, son 5 turda isə bir dəfədə meydana çıxmadı.

İspaniyada onun oyununda yaşanan enişin səbəbləri ilə bağlı müxtəlif ehtimallar var idi. Futbolçunun yaxın ətrafındakı qaynağa istinad edən ESPN yazırdı ki, Rodriqonun Ançelotti ilə problemi yoxdu, sadəcə, çox yaxın olduğu nənəsinin ölümü ona təsir edə bilər. Üstəlik sağlıq durumu ilə bağlı da problem var idi. Məsələn, futbolçu mayda qızdırma içində yanırdı.

Ancaq daha bir taktiki səbəb də var – sirr deyil ki, Rodriqo doğma mövqedə oynamır. Hücumun solunu Vinisius “zəbt edib”, mərkəz Mbappenin inhisarındadı. Rodriqonu artıq neçə ildi sağa çəkirlər, ancaq burda onun üçün çətindi. Braziliyalı karyerasında solda başlayıb, ordan mərkəzə meyillənərək sağ ayaqla özünəməxsus zərbə vurmağı xoşlayır. Sağ cinahda oynayanda isə potensialı açıq-aşkar aşağı düşür. Futbolçu hələ 2024-ün sentyabrında belə demişdi:
Ançelotti hadisələrin belə axarında heç bir problem görmürdü. Hərçənd bəlkə də diplomatcasına sərt suallardan qaçırdı:
Aydın məsələdi ki, Xabi Alonso gələndən sonra vəziyyət ciddi şəkildə dəyişməyib. Bask mütəxəssis tədricən “Real”ı üç müdafiəçili sistemə öyrəşdirir, ancaq bu da Rodriqoya elə bir üstünlük qazandırmır. Lateral mövqeyi onluq deyil, bir halda ki, Aleksander-Arnold da ora alınıb. Alonso hücumda Vinisiusla yanaşı, gənc Qonsalo Qarsiyaya üstünlük verir, onu da Mbappe əvəz edəcək.

Prinsipcə Rodriqodan 3-4-3 sxemində hücumun mərkəzinə yaxın olan insayd kimi yararlanmaq mümkündü. Ancaq birincisi, yeni baş məşqçisi hələ bu modeli tətbiq etmir, ikincisi, yenə də Rodriqo üçün ən yaxşı mövqe deyil. Rodriqo solda oynamağa həvəslidi, bununla bağlı da heç bir perspektiv yoxdu. Vinisius var, o getsə belə, “Real” Holann kimi mərkəz hücumçusu gətirəcək, Mbappeni isə öyrəşdiyi sol cinaha çəkəcək.

Elə durum yaranıb ki, Rodriqonun “Real”da qalmasını əsaslandıran yeganə səbəb statusu qorumaq ola bilər. Ancaq buna dəyərmi? Bir halda ki, transfer bazarında sənin persona ciddi diqqət var. “Arsenal” məhz elə sol vinger axtarır. İdeal variantdı.

Sadəcə, sual doğuran məqam odu ki, “topçular” Subimendi və Dyökereş ilə bağlı sövdələşməni bitirəndən sonra braziliyalı üçün pul tapacaqmı? Üfüqdə PSJ-nin də silueti canlanır, ancaq bu klubla bağlı durum birmənalı deyil. Axı parislilərin Rodriqosuz da möhtəşəm heyəti var. Son vaxtlar geniş müzakirə olunan Səudiyyə Ərəbistanı variantına gəlincə, buna heç baxmağa dəyməz – Rodriqonun cəmi 24 yaşı var, hələ futbol dünyasına çox şey sübut etməlidi.

Ancaq bir gerçək gün işığı kimi aydındı – “Real”dan getmək hamı üçün ən yaxşı qərar olacaq. Futbolçu böyük istedadını ifadə etmək üçün məkan, klub isə ciddi pul (100 milyon avro civarında) qazanacaq. Belədə madridlilər də öz meyarlarına cavab verən başqa futbolçu ala bilər. Bundan sonra klubla futbolçunun bir-birini incitməsinin heç bir mənası yoxdu.

"Football-plus.az"