''Qalatasaray'' gələn ilin yayında Madriddə ''Real'' ilə qarşılaşa bilər.

Football-plus.az xəbər verir ki, bu məlumatı ''Bleacher Report'' saytı yayıb. Məsələ burasındadı ki, Madrid nəhəngi əvvəlki dönəmlərdə hər il təşkil etdiyi və öz əfsanəvi prezidenti Santyaqo Bernabeunun adını daşıyan turniri bərpa etmək istəyir.

''Santyaqo Bernabeu kuboku'' adlı dostluq turniri 2018-dən bu yana keçirilmirdi. Adətən turnir iki komanda arasında oynanılırdı və qalibə kubok təqdim olunurdu. Gələn yay ''Real'' rəhbərliyi bu turniri 4 komandanın iştirakı ilə keçirmək istəyir. Bunun üçün ''Arsenal'' və ''Milan'' ilə yanaşı ''Qalatasaray''a da təklif göndəriləcək! İstanbul nəhəngi daha öncə ''Santyaqo Bernabeu kuboku''nun iki dəfə - 2011 və 2015-ci illərdə iştirakçısı olub. Hər iki halda ''Real'' ''Cim-Bom''u 2:1 hesabı ilə üstələyib.

Onu da bildirək ki, turnir daha öncə 1979-85-ci illərdə məhz 4 komandanın iştirakı ilə keçirilirdi. 1985-dən sonra ''Real'' istədiyi kluba dəvət göndərirdi və qalib bir oyunla müəyyənləşirdi. Yeganə istisna 2002-ci ildə oldu. O vaxt ''Kral klubu''nun yüzillik yubileyi ilə əlaqəli olaraq turnirdə 4 komanda iştirak etdi.