“Bəli, ilk oyunumuzu keçirdik. Birinci hissədə müqaviləmiz olan bütün futbolçulara şans verildi. İkinci yarıda isə baxışda olan 9 oyunçu meydana çıxdı. Bildiyimə görə, “Qəbələ” toplanışa bizdən 10 gün əvvəl start verib. Məğlubiyyətdə həm heyətdəki rotasiyanın, həm də bu məqamın rolu oldu. Komandanın oyunundan razı qaldıq. Ayxan müəllim də matçı faydalı saydı. Futbolçuların bəzi güclü və zəif cəhətlərini öyrəndi. Heyətlə bağlı plana gəlincə, daha bir legioner transfer etmək istəyirik. Sonra yerli futbolçularla güclənməyə çalışacağıq. Maliyyə problemlərindən də xəbərdarsız. Bizim üçün yenilik deyil. Öyrəşmişik. Üç ildi vəziyyət eynidi. Hətta növbəti mövsüm üçün AFFA-nın məlum qərarı üzündən büdcə 500 min manat az olacaq. Amma minimum güclə maksimum iş görməyə çalışacağıq. Təvazökarlıqdan uzaq olsa da deyim ki, son iki mövsümdə bunu bacarmışıq. 1-ci liqada çempion olduq, premyer-liqada qalmağı bacardıq. 1-ci liqanın da ən varlı klubu deyildik. Uğurlarımız onu göstərir ki, pul çox şeyi həll etsə də, hər şeyi həll etmir. Əks halda, futbol oynamağa ehtiyac qalmazdı, klublar turnir cədvəlində maliyyə durumuna görə sıralanardı. Hər halda, bu gün maliyyə durumunun yaxşılaşdırılmasıyla bağlı danışıqlar davam edir. Amma tezliklə bu problemin aradan qaldırılacağını demək çətindi”.