“Bavariya”nın və İspaniya millisinin hücumçusu Brayan Saraqosa “Barselona”nın hədəfinə düşüb.

İspaniyanın “El Chiringuito” nəşrinin məlumatına görə, Kataloniya klubunun rəhbərliyi 23 yaşlı futbolçunun La Liqada oynamağa tam hazır olduğunu və hazırda maliyyə baxımından ən sərfəli variantlardan biri olduğunu düşünür.

Brayan “Barselona”nın ona olan marağı ilə bağlı xəbərlərə sosial şəbəkələrdə bəyənərək reaksiya verib. Klubun yaxın günlərdə futbolçunun transferi üçün rəsmi təklif göndərəcəyi də bildirilir.

Saraqosa ötən mövsümü icarə əsasında “Osasuna”da keçirib və 28 oyunda 1 qol, 6 məhsuldar ötürmə ilə yadda qalıb. İspaniyalı vingerin “Bavariya” ilə müqaviləsinin müddəti 2029-cu ilin yayına qədərdi.