Runi Barqi artıq “Barselona”nın oyunçusu sayılır. “Kopenhagen”in oyunçusunun İspaniya klubuna gözlənilən keçidi rəsmiləşib.

"Football-plus.az" xəbər verir ki, “Barselona”nın Runiyə görə Danimarka klubuna nə qədər təzminat ödəməsinə aydınlıq gətirilmir. İspaniya klubunun mətbuat xidmətinin məlumatında isveçli forvard ilə müddəti 2029-cu ilin yayına qədər razılaşdırılan müqavilə imzalandığı bildirilib.

Xatırladaq ki, 19 yaşlı futbolçu zədə səbəbindən Danimarka Superliqasının 2024/25 mövsümündə yalnız 5 oyun keçirib. 2023/24 mövsümündə isə 23 matçda 7 qol vurub.

Yeri gəlmişkən, “Barselona” rəhbərliyi “Çelsi”nin hücumçusu Nikolas Ceksonla maraqlanır. “Caught Offside” nəşrinin məlumatına görə, İspaniya klubu Robert Levandovskinin əvəzləyicisi kimi 24 yaşlı futbolçunu heyətinə qatmaq istəyir. İngiltərə təmsilçisi Ceksonu 50 milyon avro dəyərində qiymətləndirir. Lakin “Barselona” qarşı tərəflə icarə variantını müzakirə etməyi planlaşdırır.

Nikolas ötən mövsüm “Çelsi”nin heyətində 37 oyuna çıxaraq 13 qol vurub və 6 məhsuldar ötürmə edib. Seneqallı futbolçunun London klubu ilə müqaviləsinin müddəti 2033-cü ilin yayına qədərdi.