Con Viktor tezliklə Braziliyadan İngiltərəyə üz tuta bilər. “Botafoqo”nun qapıçısı “Mançester Yunayted”in maraq dairəsinə düşüb.

“Sport Witness”in məlumatına görə, 29 yaşlı braziliyalı futbolçu Klublararası Dünya Çempionatındakı uğurlu çıxışı ilə MY-nin məşqçilərinin diqqətini cəlb edib.

Onun müqaviləsində olan xüsusi bəndə əsasən, klublar arasında danışıqlara ehtiyac qalmadan Con ilə birbaşa razılıq əldə etmək imkanı yaradır. Transferin dəqiq məbləği açıqlanmasa da, bəzi məlumatlara görə, MY 6,7 milyon avroya keçidi reallaşdıra bilər.

Xatırladaq ki, “Botafoqo” dünya çempionatında 1/8 finala qədər irəliləyib və bu mərhələdə “Palmeyras”a əlavə vaxtda 0:1 hesabı ilə uduzub. Viktor turnirdə komandasının keçirdiyi 4 oyunun hamısında meydana çıxıb və ümumilikdə 3 qol buraxıb.

Bu arada “Yunayted” heyətinə yeni futbolçu qatıb. İngiltərə klubunun mətbuat xidmətinin məlumatına görə, “Serro Portenyo”dan Dieqo Leon transfer edilib. Onunla imzalanan müqavilənin detalları hələlik açıqlanmayıb.

18 yaşlı cinah müdafiəçisi böyüklər səviyyəsində 33 matç keçirib və 4 qol vurub. Leon Paraqvayın 20 yaşadək futbolçulardan ibarət milli komandasında da oynayır.