Batumidə keçirilən şahmat üzrə qadınlar arasında Dünya kubokunda qeydə alınan ilk nəticələri xəbər vermişdik.

Xanım Balacayeva 1/64 finalda mübarizəni dayandırmış, Ülviyyə Fətəliyeva 1/32 finala adlamışdı. Gövhər Beydullayeva ilə Gülnar Məmmədova isə tay-brekdə mübarizə aparacaqdı.

Gövhər iranlı Anahita Zahedifar, Gülnar isə Kanada təmsilçisi Yunşan Li ilə qarşılaşıb. Gülnar daha uğurlu çıxış edərək, mərhələ adlayıb. Gövhər isə iki dəfə önə keçsə də, üstünlüyünü qoruya bilməyib.
Ülviyyə 1/32 finalda Gürcüstan təmsilçisi Lela Cavaxişvili ilə qarşılaşıb və ilk oyunda uduzub.

Gülnar da Polina Şuvalovaya (FİDE) uduzub. İyulun 10-da hər iki şahmatçımız cavab görüşü keçirib. İlk oyunda bu rəqiblərə uduzan şahmatçılarımız yola davam etmək üçün mütləq qələbə qazanmalıydılar. Amma Ülviyyə heç-heçə oynayıb, Gülnar isə növbəti də məğlub olub.

Bununla da bütün şahmatçılarımız mübarizəni dayandırıb. Dörd şahmatçıdan heç birinin 1/32 finaldan irəli gedə bilməməsi, təbii ki, uğursuzluqdu.