“Hər komandanın yüksəlişi olduğu kimi, eniş dövrləri də olur. Hazırda biz eniş mərhələsini yaşayırıq – xalq dili ilə desək, sanki qara zolaqdayıq. Bir çoxları əsl səbəbi bilmədiyi üçün bu vəziyyəti müxtəlif cür yozur. Amma əsl səbəb oyunçu baxımından çətinlik çəkməyimizdi. Litvadan aldığımız ağır məğlubiyyəti hələ də qəbul edə bilmirik. O oyuna da itkilərlə, zədələrlə çıxmışdıq. Ancaq nə desək də, bu artıq çıxış yolu deyil. Belarusla keçirdiyimiz son iki yoldaşlıq oyununda əsas heyət futbolçularından beşi müxtəlif səbəblərdən iştirak edə bilmədi. Digər səbəb isə qızlar liqalarının dayanmasıdı. Hazırda yalnız Rusiyada və Qazaxıstanda çempionat fəal şəkildə keçirilir. Bizim heyətdə həmin liqalarda çıxış edən yalnız iki əsas oyunçu yer alırdı. Belarus yığmasının isə 90 faizi Rusiyanın ən güclü klublarında əsas heyət oyunçularıdı. Bu da onların həm fərdi ustalığa, həm də oyun praktikasına görə bizdən üstün olduğunu göstərir. Buna baxmayaraq, ilk oyundan fərqli ikincidə çox yaxşı oynadıq. Buna oyuna baxan hər kəs şahiddi. Təəssüf ki, qapımızda bəzi səhvlərdən sonra qollar buraxdıq. Qeyd etmək lazımdı ki, Belarus yetərincə güclü rəqibdi. Ən azı həmişə B liqasında oynayan komandadı. Belə oyunlardan dərs çıxarmalıyıq. Qarşıdakı toplanış üçün dörd ay vaxtımız var. Düşünürəm ki, növbəti toplanış bizim üçün daha uğurlu olacaq. Əlimizdən gələnin ən yaxşısını edirik, amma bəzən rəqibin ustalıq səviyyəsi, oynadıqları çempionatlar bu eniş dövrümüzdə acı məğlubiyyətlər almağımıza səbəb olur. Məğlubiyyəti, düşdüyümüz vəziyyəti qəbul etməliyik. Bu vəziyyətdən çıxmaq üçün daha da güclü olmalıyıq. Düşünürəm ki, əsas oyunçularımız tam şəkildə geri qayıdandan sonra bizə olan inamı doğrultmaq üçün bütün gücümüzü ortaya qoya biləcəyik. Əslində Litvanı udsaydıq, bəlkə də artıq B liqasındaydıq. Təəssüf ki, uduzduq – həm də çox ağır şəkildə. Amma komandama inanıram. Bu hal hər bir komandanın başına gələ bilər. İnsanların mənfi reaksiyasını başa düşürəm. Bir çoxlarının bizdən gözləntiləri yüksəkdi, çünki son vaxtlar göstərdiyimiz yaxşı nəticələr bu ümidləri artırmışdı. Amma o yaxşı nəticəli günlər yenidən gələcək. Sadəcə, səbirlə öz üzərimizdə daha çox işləməli və nə olur-olsun, yolumuza davam etməliyik”.