"Vallah, hələ də matçın şokundayam. Doğma azarkeşlərimizin önündə böyük hesabla uduzmağımız mənə çox pis təsir etdi. Sensasiyadı. Oyuna həddən artıq köklənmişdik. Motivasiyamız yüksək idi. Çox ciddi hazırlaşmışdıq. Özgüvənimiz var idi. Səfərdə qalib gəlmişdik. Əmin idik ki, ev oyununda da qələbə qazanacağıq. Görünür, məhz bunun nəticəsində uduzduq. Əslində rəqibin güclü olduğunu bilirdik. Futbol bəzən amansız olur. Belə məğlubiyyət hər kəsin başına gələ bilər. Sadəcə, doğma azarkeşlərimizin önündə uduzmaq bizi çox sarsıtdı. Onlara qələbə bəxş etmək istəyirdik. AFFA rəhbərliyi də bizə dəstək olmaq məqsədilə stadiona gəlmişdi. Təəssüf ki, onları sevindirə bilmədik. Portuqaliyadan, İsveçrədən buraxmadığımız qədər Litvadan qol buraxdıq. Düzü, hələ də nə baş verdiyini anlaya bilmirəm. Xeyli qol imkanından yararlana bilmədik. Amma Litva hər fürsəti maksimum dəyərləndirdi. Halbuki qızlarımız oyuna tam hazır idi. Litvanın qələbəsinin səbəbi bizik. Onlara imkanlar yaratdıq. Səhvlərə yol verdik. Komanda olaraq çox üzgünük. Bu məğlubiyyətə görə komanda adından azarkeşlərdən üzr istəyirəm. Bəhanə kimi anlaşılmasın, amma bu matça itkilərlə çıxmışdıq. Əsas oyunçulardan Nazlıcan Parlakla Kristina Bakarandze yox idi. Başqa zədəlilər var idi. Bu amillər də problem yaratdı. Bizi yaxından tanıyanlar bilir ki, həmişə ən yaxşısını etməyə çalışmışıq. Bir daha belə səhvləri təkrarlamamalıyıq. Tezliklə toparlanmalı, bu oyundan nəticə çıxarmalı və növbəti oyunlara köklənməliyik. Pley-offda oynamaq şansımız var. Komanda olaraq bu durumdan xilas olmalıyıq. Daha yaxşısını etməliyik".