''Bura demək olar, hər il gəlirəm. Çünki ''Silverstoun'' qran-prisi hər il tətilimin son günlərinə təsadüf edir. Ona görə də rahat şəkildə gəlib yarışı izləyə bilirəm. Bir daha deyirəm ki, ''Formula-1''i sevirəm. Amma eyni zamanda yeni şeylər öyrənməyi də sevirəm. Yeni insanlarla, komandaların rəhbərləri və pilotları ilə yaxından tanış olmaq gözəl bir təcrübədi. Müəyyən fikirləri bir-birimizlə bölüşürük. Eyni zamanda bir idman növündən digər idman növünə keçirə biləcəyiniz liderlik kimi keyfiyyətlərin olub-olmadığına da baxıram. ''Fənərbaxça'' ilə mövsümün əvvəlinin necə alınacağını zaman göstərəcək. Avqustun əvvəllərində bizi Çempionlar Liqasının təsnifat mərhələsi gözləyir. Təbii ki, çətin rəqiblərin olduğunu bilirik. Amma ÇL-in əsas mərhələsinə vəsiqə qazanmaq üçün əlimizdən gələni edəcəyik. Bu, komandada yer alan hər kəsin arzusudu. Jota haqda danışmağı xoşlamıram. Təbii ki, o, ən üst səviyyəli futbolçu idi. Adətən kimsə, bu həyatdan köçəndə onun haqda yaxşı sözlər deyirlər. Amma Jota həqiqətən də çox yaxşı oğlan idi. Bizim onunla menecerimiz eyni idi. Yəni bizim strukturun içində yer aldığı üçün onun haqda çox şey bilirdim. Ona görə də Liverpuldakı insanlar onunla bağlı sözlərimin həqiqət olduğunu bilir. Jotaya bu həyatda heç nə asan başa gəlməmişdi. Hər şeyə öz gücünə, mübarizə apararaq nail olmuşdu. Heç vaxt populyarlığın arxasınca qaçmırdı. Populyarlıq özü onu tapdı. Çox faciəvi bir hekayədi. Çünki 3 uşaq atasız, cavan bir xanım ərsiz qaldı və üstəlik yaşlı ana-ata hər iki övladını itirdi. Ağlasığmaz bir şeydi. Bunu qəbul etmək çox çətindi. Bəlkə də nə vaxtsa, qəbul edəcəyik. Amma indi yox. ''Liverpul'' onun ''20'' nömrəli formasını əbədiləşdirməklə necə möhtəşəm bir klub olduğunu növbəti dəfə göstərdi''.