"Bəli, həqiqətən belə xoşagəlməz hal yaşanıb" – Adil Şükürovdan şok etiraf
Xəbər verdiyimiz kimi, "Kəpəz"lə azarkeşləri arasında narazılıq yaranıb. Buna komandanın yay hazırlıq planı çərçivəsində Gəncədə baş tutan məşq prosesinin tərəfdarlar üçün qapalı keçirilməsi səbəb olub. Əlbəttə, azarkeşlər belə qərarı normal addım kimi qiymətləndirə bilərdi. Amma onlar bunu baş məşqçi Adil Şükürovun məşqləri izləmək üçün dəvətini qəbul edib meydançaya təşrif buyuranda öyrənib. Sonradan qərar dəyişib və azarkeşlər stadiona buraxılmayıb.
Görəsən, dəyişikliyə nə səbəb olub? Gəncəlilər bu addımın rəhbərlik tərəfindən atıldığını iddia edir. Bəs başverənlərin müqəssiri kimdi? Axı belə davranış baş məşqçiylə azarkeşlərin münasibətlərinə mənfi təsir edə bilər.
Adil Şükürov "Football-plus.az"a açıqlamasında durumu belə izah etdi:
"Bəli, həqiqətən belə xoşagəlməz hal yaşanıb. Ancaq məsələnin üstünə gedilməsinin tərəfdarı deyiləm. Kim qərar verib, kim kimi dəvət edib, kim incik düşüb - bunlar geridə qaldı . Artıq azarkeşlər məşqləri izləyə bilir. Bu gün günahkar axtarası olsaq, məşq prosesinə, yeni mövsüm üçün hazırlıqlara mane olacaq. Ona görə də umu-küsünü arxa plana keçirməliyik. İş olan yerdə hansısa anlaşmazlığın baş verməsi qaçılmazdı. Yəni hadisəni texniki anlaşmazlıq hesab edirəm və məsələnin unudulduğunu düşünürəm".
KƏNAN BAHADIR
Digər xəbərlər
