Serxio Ramosun şərəfini qoruduğu “Monterrey” pley-offa yüksəlmək üçün həm özü qalib gəlməli, həm də qrupun digər oyununda 2:2 və ya daha qollu heç-heçənin qeydə alınmayacağına ümid bəsləməli idi.

"Football-plus.az" xəbər verir ki, hər şey meksikalıların istədiyi kimi oldu.

Bu komanda “Urava Red Daymonds”un 183 sm boya malik qapıçısının zəif yerinin uzaq məsafədən vurulan zərbələr olduğunu müəyyənləşdirəndən sonra artıq ilk yarıda intriqanı öldürdü. 30-39-cü dəqiqələrə təsadüf edən hər üç qol məhz uzaq məsafədən vuruldu. Yekunda “Monterrey” 4 cavabsız qolla parlaq qələbə qazandı.

İtaliya və Argentina nəhənglərinin dueli isə gözlənildiyi kimi gərgin və maraqlı alındı. “İnter” müəyyən üstünlüyə malik olsa da, ümumilikdə 2-ci hissənin ortalarına qədər oyun bərabər səviyyədə keçirdi. Qolsuz bərabərlik milanlılara sərf etmirdi. Ona görə də komanda son yarım saatda təzyiqi artırmağa başladı. Matçın qırılma anı 65-ci dəqiqəyə təsadüf etdi. Martines Kuarta “son ümid folu”na görə birbaşa qırmızı vərəqə alaraq komandasını çox çətin durumda qoydu. “River” azlıqda bu təzyiqə cəmi 7 dəqiqə tab gətirə bildi və 20 yaşlı Françesko Espozito qələbə qolunun müəllifi oldu.

Argentina çempionu qalan müddətdə azarkeşlərini sevindirə biləcək heç nə ortaya qoya bilmədi. Əksinə, komanda həm 2-ci qolu buraxdı, həm də 2-ci qırmızı vərəqəni aldı. Son anlarda hücuma qoşulan mərkəz müdafiəçisi Bastoni yekun nəticəni müəyyənləşdirdi. Beləliklə, Argentina nəhəngləri üçün turnir olduqca uğursuz alındı.

“Boka Xuniors”un ardından “River Pleyt” də qrup mərhələsini aşa bilmədi. “Monterrey” isə əksinə, pley-offa yüksəlməklə futbol dünyasını yaxşı mənada təəccübləndirdi.

E qrupu, 3-cü tur
İnter – River Pleyt 2:0 (0:0)
İnter (Milan, İtaliya): Zommer, Dyumfris, Darmian (De Vrey, 82), Açerbi, Bastoni, Dimarko (Auqusto, 62), Mxitaryan, Asllani, Barella (Suçiç, 62), F.Espozito (S.Espozito, 82), L.Martines (Karboni, 73).
River Pleyt (Bueno Ayres, Argentina): Armani, Q.Montyel, Martines Kuarta, Dias, Akunya, Mesa (İ.Fernandes, 55), Kranevitter (Kostantini, 61), Alyendro (Lansini, 61), Mastantuono, Kolidio (Pesselya, 68), Borxa.
Qollar: F.Espozito, 72 (1:0). Bastoni, 90+3 (2:0).
Vərəqələr: Q.Montyel, 22. Bastoni, 30. Auqusto, 77. Lansini, 77. S.Espozito, 85. Dias, 88. Dyumfris, 90+4 – sarı. Martines Kuarta, 65. Q.Montyel, 90+5 – qırmızı (ikinci sarı).
Hakim: İlgiz Tantaşev (Özbəkistan).
25 iyun. Sietl. 45135 tamaşaçı.

Urava Red Daymonds – Monterrey 0:4 (0:3)
Urava Red Daymonds (Saytama, Yaponiya): Nişikava, Sekine (Oqivara, 68), Danilo, Hoybraten, Naqanuma, Yasui (Nitta, 81), Qustafson (Matsumoto, 46), Kaneko (Santana, 46), Vatanabe, Savio (Okubo, 70), Matsuo.
Monterrey (Meksika): Andrada, Çaves, Medina (Qusman, 85), Ramos, Reyes (Arteaqa, 65), Ambris (Kortiso, 84), Deossa, Torres, Korona (Fimbres, 65), Berterame, Alvarado (La Rosa, 65).
Qollar: Deossa, 30 (0:1). Berterame, 34 (0:2). Korona, 39 (0:3). Berterame, 90+7 (0:4).
Vərəqə: yoxdu.
Hakim: Feliks Svayer (Almaniya).
25 iyun. Kaliforniya. 14312 tamaşaçı. 

1. İnter 3 2 1 0 5-2 7
2. Monterrey 3 1 2 0 5-1 5
3. River Pleyt 3 1 1 1 3-3 4
4. Urava Red Daymonds 3 0 0 3 2-9 0