“Levante” və “Elçe”nin ardından “Ovyedo” da elitaya vəsiqə qazandı. Bununla bağlı söhbətə başlamamış La Liqa 2-nin reqlamentini xatırladaq.
İlk iki yeri tutan komanda (Levante, Elçe) elitaya adlayır, 3-6-cı yerləri tutanlar isə yarımfinalda qarşılaşır. Bu il yarımfinal oyunlarından "Ovyedo" və “Mirandes” qalib ayrıldı. İyunun 15-i və 21-də isə elitaya vəsiqə uğrunda final oyunları keçirildi.

“Mirandes” evdə keçirdiyi ilk oyunda 1:0 hesabıyla qalib gəldi. İyunun 21-də Ovyedoda keçirilən və 29624 azarkeşin izlədiyi oyun da meydan sahibləri üçün uğursuz başladı – 16-cı dəqiqədə Xoakin Paniçelli “Mirandes”i irəli çıxardı. Amma 38-ci dəqiqədə hadisələrin axarı dəyişdi.

İlk oyundakı yeganə qolun müəllifi Alberto Reyna cərimə meydançasında əllə oynadığına görə qonaqların qapısına penalti təyin olundu. Topun arxasına keçən 40 yaşlı Santi Kasorla bərabərlik qolunu vurmaqla geridönüşün əsasını qoydu. 52-ci dəqiqədə İlyas Çayra “Ovyedo”nu irəli çıxardı. 74-cü dəqiqədə birbaşa qırmızı vərəqə alan Serxio Postiqo “Mirandes”in işini bir qədər də çətinləşdirdi. İki oyunun nəticəsinə görə hesab bərabər olduğundan əlavə vaxta ehtiyac duyuldu.

Nəhayət, 103-cü dəqiqədə Fransisko Portilyo “Ovyedo”nu 24 ildən və ya 8770 gündən sonra elitaya qaytaran qolu vurdu.

Təbii ki, final fitindən sonra Kasorla hamıdan çox diqqət mərkəzində idi. O, məhz “Ovyedo”nun yetirməsidi, 18 yaşına qədər bu klubun sistemində olub. Ancaq həmin vaxt əsas heyətdə oynamaq imkanı qazanmayıb. “Ovyedo” 2003-də gənc istedadı “Vilyarreal”a satıb, çünki 3-cü diviziona yuvarlandığına görə onu saxlamaq üçün pulu yox idi. Santi “Ovyedo”ya 20 ildən sonra – 2023-də qayıtdı. Qətər “Əl-Sədd”ini “Ovyedo”ya dəyişərkən minimal maaşa razılaşdı və belə dedi:

“Ovyedo” ötən il elitaya vəsiqə uğrunda pley-offun finalında “Espanyol”a uduzmuşdu, amma bu il, yəni 2-ci cəhddə hədəfinə çatdı.

La Liqaya vəsiqə uğrunda pley-off, yarımfinal: Almeriya – Ovyedo 1:2, 1:1, Rasinq - Mirandes 3:3, 1:4. Final: Mirandes – Ovyedo 1:0, 1:3, əlavə vaxtda.