İsmayıl Kartaldan xəbər var. Tanınmış türkiyəli mütəxəssis İran təmsilçisi ''Persepolis''dən ayrılıb.

"Football-plus.az" xəbər verir ki, bu faktı Tehran klubunun idarə heyətinin sədri Reza Dərviş də təsdiqləyib.

O, məşqçi ilə anlaşaraq qarşılıqlı şəkildə vidalaşdıqlarını bildirib. 2023/24-də ''Fənərbaxça''nın başında mühüm göstəricilərə nail olmasına baxmayaraq çempion ola bilməyən 64 yaşlı mütəxəssis İrana yanvarın sonlarında yollanmışdı. Amma məşqçi qarşıya qoyulan hədəfə çata bilmədi. ''Persepolis'' ''Traktor''un çempionluğu ilə nəticələnən mövsümü yalnız 3-cü pillədə başa vurdu.

Kartal yanvarda ilyarımlıq müqaviləyə imza atmışdı. Yəni onun hələ birillik müqaviləsi var idi. Amma göründüyü kimi tərəflər işbirliyini davam etdirməmək qərarına gəlib.

Ümumilikdə ''Persepolis'' Kartalın dönəmində keçirdiyi 16 oyundan 8 qələbə, 4 heç-heçə, 4 məğlubiyyətlə ayrılmış oldu ki, bu da hər oyuna orta hesabla 1,75 xal deməkdi (top fərqi - 21:16).