Milli Basketbol Assosiasiyasında 2024/25 mövsümünə yekun vuruldu.

"Football-plus.az" xəbər verir ki, “İndiana” ilə seriyanın 7-ci oyununda inamlı qələbə qazanan “Oklahoma-Siti” çempionluğu bayram etdi. “Tander”in müdafiəçisi Şey Gilces-Aleksander 29 xal və 12 məhsuldar ötürmə ilə ən məhsuldar basketbolçu oldu.

“İndiana”nın oyun qurucusu Tayriz Haliberton ilk çeyrəkdə dabanından zədə aldı və mübarizəni davam etdirə bilmədi.

Gilces-Aleksander final seriyasının ən dəyərli oyunçusu sayıldı. 26 yaşlı kanadalı müntəzəm çempionatda da eyni statusu qazanmışdı. Yəni Şey son 12 ildə eyni mövsümdə bu iki titula sahib olan ilk basketbolçudu. 2013-cü ildə “Mayami”nin forvardı Lebron Ceyms də həm müntəzəm çempionatın, həm də final seriyasının ən yaxşısı sayılmışdı.

Bu çempionluğu “Oklahoma-Siti” üçün ilk titul sayanlar da var, 2-ci sayanlar da. İş ondadı ki, bu komanda 1979-ci ildə Sietldə və “Sietl Supersoniks” adı ilə çıxış edərkən də çempionluğu bayram edib. İndi isə yeni adla titul qazanır. Yeri gəlmişkən, bu çempionluğun başqa bir özəlliyi də var. Ardıcıl 7-ci mövsümdə MBA-da fərqli komanda çempion oldu. Bu isə liqa tarixində bir ilkdi. 2-ci yerdə 1975-80-ci illərdə çempionun daim dəyişməsi dayanır.

2019-cu ildən bəri MBA çempionluğunu bu komandalar bayram edib: “Toronto” (2019), “Leykers” (2020), “Miluoki” (2021), “Qolden Steyt” (2022), “Denver” (2023), “Boston” (2024), “Oklahoma-Siti” (2025).

“Oklahoma-Siti” son 48 ildə çempion titulunu qazanan ən gənc komandadı. “Tander”də orta yaş 25,56-dı. Oklahomalılar bu göstəricidə yalnız 1976/77 mövsümünün qalibi olan “Portlend”dən (25,03) geri qalır.

"Oklahoma-Siti"nin daha bir rekordunu qeyd etməyə dəyər. Komanda müntəzəm mövsüm və pley-offlar matçları qarışıq 12519 xal toplayıb. Bu, yarış tarixində ən yüksək göstəricidi. Bundan əvvəl ən məhsuldar komanda 2018/19 mövsümündə "Qolden Steyt" (12161 xal) olub.

Bu uğurdan sonra “Oklahoma-Siti”nin baş məşqçisi Mark Deyqnoltu da dinləməyə dəyər: