"Zirə"nin Konfrans Liqasının 2-ci təsnifat mərhələsindəki rəqibi "Hayduk"da genişmiqyaslı islahatlar olacaq.

"Football-plus.az" Xorvatiya mətbuatına istinadla xəbər verir ki, iyunun 30-da klubun Müşahidə Şurasının sədri vəzifəsinə elektron seçki keçiriləcək. Artıq bu post üçün 5 namizəd var. Bunlar Pavasoviç Viskoviç, Yosip Babiç, Damir Dominikoviç, Frano Beloqradski və Branimir Britviçdi. Seçiləcək şəxs növbəti 4 il ərzində sözügedən vəzifəni icra edəcək.

Bildirək ki, "Hayduk" azarkeşləri dəfələrlə klubun son illərdəki fəaliyyətindən narazı qaldığını, ciddi dəyişikliklərin zəruri olduğunu vurğulayıb. Sonuncu çempionluğu 2004/05 mövsümündə yaşayan tərəfdarlar 20 illik həsrətin sona çatmasıyla yanaşı, avrokuboklarda ciddi uğurlar tələb edir.

Hər halda, kollektiv 21-ci əsrdə bu istiqamətdə "dişə vurulası" nəticələr qazana bilməyib. Əlbəttə, bu, səbəbsiz deyil. Çünki "dəniz ustaları" son illərdə maliyyə çətinlikləriylə üzləşib. Klubun xüsusilə əsas komandasına yetərincə sərmayə ayrılmayıb. İstər daxili çempionatda, istərsə də avrokuboklarda nəticələr baxımından sıçrayışa nail olmaq istəyən rəhbər şəxslər düzgün strategiya formalaşdıra bilmədiyindən gəlirlər azalıbsa, xərclər artıb. Yarıtmaz idarəçilik "Hayduk"un borc bataqlığına sürüklənməsinə səbəb olub.

Yuxarıda adı çəkilən namizədlər "Hayduk" azarkeşlərinə müraciətlərində maliyyə durumunun sabitləşdirilməsi, idman infrastrukturunun inkişaf etdirilməsi, kluba işçi qruplarından əsas heyətə qədər təcrübəli şəxslərin cəlb edilməsi, məsuliyyətli, strateji və müstəqil fəaliyyətin araya-ərsəyə gətirilməsi, ən əsası, "Hayduk"un avrokuboklardakı əzəmətini qaytarmaq yönündə işlər görüləcəyini söz verib. Onlar nəzarətin formal xarakter daşımayacağını, bununla belə, tərəfdarlara müntəzəm hesabat veriləcəyini bildirib.

Qısası, "Hayduk" tarixi dəyişiklik astanasındadı. Əlbəttə, yeni rəhbərlik məhz Konfrans Liqasında tərəqqi etməyə çalışacaq. Və bu məqam "Zirə"nin məsuliyyətini artırmalıdı.

Xatırladaq ki, "qartallar" "dəniz ustaları"yla iyulun 23-də evdə, 31-də səfərdə qarşılaşacaq.

KƏNAN BAHADIR