“Neftçi” mövsümlərarası dövrdəki ilk transferini açıqladı - Benin əsilli Sessi D’Almeydanı heyətinə qatdı.

Onun son komandası Cənubi Kipr “Apollon”o olub. Peşəkar karyerasına Fransa “Bordo”sunda başlayan Sessi daha sonra “Barnsli”, “Blekpul”, “Valansiyenn” və “Pau” kimi komandaların formasını geyib. Klub karyerası ərzində 229 oyuna çıxan futbolçu Benin yığmasının heyətində keçirdiyi 40 oyunda 5 qol vurub.

Dayaq yarımmüdafiəçisi mövqeyində çıxış edən futbolçu daha çox döyüşkənliyi və fiziki gücü ilə seçilir. Düzdü, flaqmana da bu tip oyunçu lazımdı. Amma bu üslub bəzən Bakı təmsilçisinin ziyanına da işləyə bilər. 29 yaşlı futbolçu bu mövsüm çıxış etdiyi 21 oyunda 2 məhsuldar ötürmə ilə yadda qalıb. Maraqlıdı ki, ötürmələrinin sayı qədər də qırmızı vərəqə alıb. Bu xüsusiyyəti ilə “ağ-qaralar”ın başını ağrıda bilər.

“Transfermarkt” portalı Sessinin bazar dəyərini 450 min avro göstərib.

MÜZƏFFƏR QULUZADƏ