“Kayzerslautern”ə transfer olunan Mahir Emreli böyük ehtimalla, “Nürnberq”dən fərqli burda daim əsas heyətdə oynayacaq.

Hazırda komandada Mahirdən başqa üç hücumçu var ki, onlardan ikisi – Qrant-Leon Ranos və Raqnar Ahe komandanı tərk edəcək.

Belə ki, Ermənistan millisinin hücumçusu Ranos məxsus olduğu Münhenqladbax “Borussiya”sına qayıdıb, Ahe isə “Köln”ə transfer olunub. Digər hücumçu ötən mövsüm 31 oyuna çıxaraq, 8 qol vuran, 10 məhsuldar ötürmə verən Daniel Hanslikdi. Futbolçununn statistikasın qənaətbəxş olması Mahirin rəqabətdə uduzmaq ehtimalını ortaya çıxarmır. Çünki komandanın baş məşqçisi Torsten Liberkneht 3-4-1-2 taktiki sxemi ilə oynayır. Bu da Emrelinin əsas iki hücumçudan biri olacağı deməkdi. Həmçinin “10 nömrə”nin də millimizin hücumçusuna verilməsi necə əhəmiyyət daşıdığını göstərir.

Emrelinin “Kayzerslautern”lə üçillik müqavilə bağlaması bu komandada üç il qalacağı anlamına gəlmir. Göründüyü kimi, özünü azacıq göstərən istənilən futbolçunun 1-ci bundesliqaya yolu açılır. “Kayzerslautern” Mahir üçün “tramplin” deməkdi. Belə demək olar ki, Mahir ən doğru seçimini edib. Bundan sonrası özündən aslı olacaq.

MÜZƏFFƏR QULUZADƏ