Basketbol üzrə Türkiyə çempionatında mövsümə yekun vuruldu.

"Football-plus.az" xəbər verir ki, dünən ''Ülkər Sports Arena''da final seriyasının 7-ci oyununda ''Fənərbaxça'' ''Beşiktaş''ı qəbul etdi.

Oyunu hər iki klubun prezidentləri - Əli Koç ilə Sərdal Adalı yanbayan əyləşərək izlədilər. Seriyada 3:1 öndə olan və aşkar favorit sayılan ''Fənər'' doğma fanatları önündə çempionluğu rəsmiləşdirmək fürsətini əldən vermədi. Əvvəldən sona qədər üstün oynayan və bütün çeyrəkləri öndə tamamlayan Şarunas Yasikyaviçyusun komandası 84:68 hesabı ilə qalib gəldi.

Beləliklə, seriyada hesabı 4:1-ə çatdıran ''Fənərbaxça'' ardıcıl 2-ci, son 4 ildə 3-cü, son 18 ildə 11-ci və tarixdəki 12-ci çempionluğunu əldə etdi.

Xatırladaq ki, İstanbul nəhəngi bu mövsüm buna qədər nüfuzlu Avroliqa turnirinin, eləcə də Türkiyə kubokunun da qalibi olmuşdu. Kubokun finalında da ''sarı-lacivərdlilər'' ''Beşiktaş''ı üstələmişdi. Bununla da ''Fənərbaxça'' Türkiyə basketbolunda ''trebl'' qazanan ilk komanda kimi tarixə düşdü.

Ümumiyyətlə, Avropada ''trebl'' qazanan sonuncu basketbol klubu 2015-ci ildə ''Real'' olmuşdu. Tanınmış litvalı mütəxəssis Yasikyaviçyusun isə məşqçi karyerasında 17-ci titulunu qazandığını bildirək.

Qeyd edək ki, ''Fənərbaxça'' 2024/25-də keçirdiyi 84 rəsmi oyundan 67 qələbə, 17 məğlubiyyətlə ayrılaraq mövsümü 79,7 faizlik qələbə göstəricisi ilə tamamladı.