Söz vaxtına çəkər, 4 il əvvəl, məhz iyunun 21-də “Legiya”nın “instaqram” hesabında canlı yayına çıxan, onda hələ yenicə legioner həyatına başlayan Mahir Emreli xoşladığı 5 klubun adını çəkmişdi: “Qalatasaray”, “Barselona”, “Mançester Siti”, “Bavariya”, PSJ. Ardından “2025-ci ildə özünüzü harda görürsüz” sualına da maraqlı cavab vermişdi: “Əlbəttə, bu beş klubdan birində”.

Vaxt ödü, vədə yetişdi və biz indi artıq 2025-in iyununu yaşayırıq. Mahir dünən “Kayzerslautern”lə müqavilə imzaladı. Əlbəttə, “Kayzerslautern” “Bavariya” deyil, ancaq Münhen nəhənginin yarışdığı liqanın astanasındadı. Hadisələr arzulanan kimi cərəyan etsə, “qırmızı iblislər”i elə 2026/27 mövsümündə 1-ci bundesliqada görə bilərik. Mahir orda parlaya bilsə, deməli, “Bavariya”ya da yolu açılar. Bütün bunlar gələcəklə bağlı xoş xəyallardı. Gerçəklik isə odu ki, Mahir hədəflərinə çatmaq yolunda daha bir inamlı addım atdı. Nə gizlədim, şəxsən məndə də onun karyeranı yox, pulu seçəcəyi ilə bağlı müəyyən şübhələr var idi. Amma adam Almaniyada, məhz elə 2-ci bundesliqada qalmağa, özünü növbəti dəfə bu ölkənin futbol publikasına tanıtmağa, sübut etməyə qərar verdi. Razılaşaq ki, azərbaycanlı futbolçuların mentallığında belə inadkarlığı nadir hallarda görmüşük. Mahir isə yola davam edəcək, nə qədər çətin olsa da, 1-ci bundesliqaya məhz alnının təri, qolları və inadkarlığı ilə adlamaq istəyir. Təbii, bunda 1-ci bundesliqdan ciddi təklif almamasının da rolu var. Amma 2-ci bundesliqa ən müxtəlif özəlliklərinə görə Avropanın ən güclü çempionatlarının ilk “10-luğ”unda yer alır. Odu ki, Mahirin seçimi ilə bağlı bədgümanlıq etməyə, macəra axtarmağa dəyməz. Adam nəyi və niyə seçdiyini anlayır, əvvəlki radikallıqdan, dava-dalaşdan uzaqdı, hər addımda yetkinləşdiyini, daha ağıllı və məntiqli qərarlar verməyə hazır olduğunu göstərir.

Zamanında Mahir haqda çoxlu tənqidi fikir yazmışam, indi də ona “bəy tərifi” yazmaq, onu haqq etmədiyi sözlərlə bəzəmək istəmirəm. Mahir böyük və uzun yola çıxıb. Özü də yaşını nəzərə alsaq, artıq geriyə boylanmaq, səhv etmək imkanı da yoxdu. 28 yaşını iyulun 1-də tamamlayacaq futbolçu yeni müqavilədə zaman məsələsinə də fikir verib, “Kayzerslautern”lə uzunmüddətli, üçillik müqavilə bağladı. Çox güman, bu, Mahirin karyerasında sonuncu böyük müqavilə olacaq. Odu ki, şansdan maksimum yararlanmaq, Avropaya Azərbaycan futbolunun da hansısa marka dəyərinə malik olduğunu göstərmək lazımdı. Mahir əslində çox çətin və məsuliyyətli vəzifənin altına çiynini verib.

Dəstəyimiz və dualarımız onunladı. Bacararmı? Bacaracaq!

ORXAN