“Mançester Siti” bu il daha bir transferi reallaşdırmaq üzrədi. Bu barədə Fabritsio Romano məlumat yayıb.

Tanınmış insayder İngiltərə klubunun “Milan”la Ticani Reyndersin keçidi üçün razılaşdığını xəbər verib. MS bu transferə görə 70 milyon avro ödəyəcək. Artıq tərəflər bütün detallar üzrə razılaşıblar. Yaxında transfer rəsmən açıqlanacaq.

Reynders “Milan”da 2023-cü ildən çıxış edir. “Alkmaar”dan transfer olunan 26 yaşlı yarımmüdafiəçi son mövsüm vurduğu 10 qolla A seriyasında komandasının ən yaxşı bombardiridi.

Ticani ümumilikdə bütün turnirlər nəzərə alınmaqla mövsüm ərzində 54 matçda 15 qol vurub, 5 dəfə məhsuldar ötürmə müəllifi olub.

Yeri gəlmişkən, “Yuventus” mövsümün əvvəlində “Milan”dan icarəyə götürdüyü Pyer Kalulunu birdəfəlik transfer edib. Bu barədə Turin klubunun mətbuat xidməti məlumat yayıb. “Yuventus” futbolçu ilə 4 illik müqavilə imzalayıb. “Qoca sinyora” 25 yaşlı müdafiəçi üçün qarşı tərəfə 14,3 milyon avro ödəniş edib.

Fransalı son mövsüm “Yuventus”un heyətində 39 rəsmi matça çıxıb və 1 qol vurub.