Aleksis Sançes yenidən “İnter”də oynayacaq. Təcrübəli futbolçu İtaliya klubuna qayıdacaq.

"Football-plus.az" xəbər verir ki, bu haqda məşhur insayder Fabritsio Romano məlumat yayıb. 34 yaşlı hücumçu Milan klubuna azad agent kimi keçəcək. Tərəflər birillik müqavilə üçün razılığa gəliblər.

Xatırladaq ki, Sançes 2019-22-ci illərdə “İnter”də çıxış edib. Ötən mövsümü “Marsel”də keçirib və bütün turnirlərdə 44 oyuna 18 qol vurub, həmçinin 3 məhsuldar ötürmə edib. “Transfermarkt” onun bazar dəyərini 4 milyon avro qiymətləndirir. Çilili Aleksis Avropa karyerası ərzində “Barselona”, “Arsenal” və “Mançester Yunayted”də də çıxış edib.

Onun gəlişi Xoakin Korreanın “İnter”dən gedişi ilə üst-üstə düşəcək. Son xəbərlərdə argentinalı hücumçunun “Marsel”ə keçməyə yaxın olduğu bildirilib. Fransa klubu onu 2 milyon avroya icarəyə götürəcək. Cari mövsümün sonunda isə 10 milyon avro ödəməklə birdəfəlik transfer edəcək.

Yeri gəlmişkən, Valentino Lazaro Milana qayıdası olmayıb. O, çıxışını “Torino”da davam etdirəcək. Turin klubu ötən mövsüm xidmətindən icarə əsasında yararlandığı avstriyalı hücumçunun transfer hüququnu birdəfəlik alıb. Bunun üçün 27 yaşlı futbolçuya görə 4 milyon avro ödənilib. Xatırladaq ki, Lazaro son mövsümdə A seriyasında 23 oyun keçirib.