Qvardiola doktorluq dərəcəsi aldı və Qəzzada yaşanan insanlıq faciəsindən danışdı
Uzun illərdi, ''Mançester Siti''nin başında olan Xosep Qvardiolaya Mançester Universitetində fəxri doktorluq dərəcəsi verilib.
"Football-plus.az" xəbər verir ki, ünlü mütəxəssis futboldankənar fəaliyyəti, Mançester şəhərinin inkişafına verdiyi töhfə, eləcə də ''Guardiola Sala'' ailə fondunun gördüyü işlərlə bağlı bu ada layiq görülüb. 1824-cü ildə yaradılan Mançester Universiteti Britaniyanın ən nüfuzlu universitetlərindən biri sayılır.
Qvardiola kürsüyə çıxaraq Mançester şəhərinin onun üçün böyük məna kəsb etdiyini, buranın özü və ailəsi üçün ikinci evinə çevrildiyini bildirərək bu fəxri ada layiq görülməsinin onun üçün böyük qürur mənbəyi olduğunu əlavə etdi. Amma Qvardiolanın ən çox Fələstinə dəstək verərək Qəzzanın bombalanmasını gündəmə gətirməsi diqqət çəkdi:
''Qəzzada yaşananları izləmək çox üzücüdü. Dörd yaşındaki qız və oğlanların bombalarla öldürüldüyünü, eləcə də xəstəxanalarda həyatlarını itirdiyini görürük. Burda söhbət artıq ideologiyadan və ya kimin haqlı, kimin haqsız olmasından getmir. Burda söhbət artıq bir həyat sevgisindən gedir. Orda yaşananlar bütün insanlığı maraqlandırmalıdı. Bəziləri düşünə bilər ki, bu, bizim işimiz deyil və ya orda yaşananların bizə aidiyyatı yoxdu. Amma diqqətli olmalıyıq. Çünki sonrakı 4-5 yaşında uşaqlar bizim övladlarımız ola bilər. Qəzzada uşaqların başına gələn qorxunc hadisələri gördükdən sonra hər səhər oyandıqda ilk növbədə öz uşaqlarımı görməyə çalışıram''.
Qeyd edək ki, 2023-cü ildə Xosep Qvardiolanın qızı Maria da Fələstinə dəstək paylaşımı etməsi ilə gündəmə gəlmişdi.
