''Mançester Siti''də dəyişikliklər davam edir.

"Football-plus.az" xəbər verir ki, klubun yollarını ayırdığı isimlərdən biri də Skott Karsondu. 39 yaşlı qapıçının müqavilə müddəti başa çatdığından və klub tərəfindən yeni müqavilə təklif olunmadığından onun ''Siti'' macərası rəsmən bitdi.

İngiltərəli əlcək sahibi 2019-cu ildən klubda idi. Düzdü, 3-cü qapıçı statusunda olan Karson bu 6 il ərzində cəmi 2 rəsmi oyuna çıxaraq 107 dəqiqə meydanda oldu. Ancaq Karson ''Siti''dəki karyerasında statistikası ilə yox, qazandığı titullarla və paltardəyişmə otağındakı rolu ilə diqqət çəkdi.

Təcrübəli qapıçı bu illər ərzində premyer-liqanı 4 dəfə, liqa kuboku ilə ölkə superkubunu 2 dəfə, Çempionlar Liqası, Klublararası DÇ, Avropa superkuboku və İngiltərə kubokunu 1 dəfə qazanmaqla ümumilikdə 12 titul əldə etdi.

Onun forma geydiyi oyunlara gəlincə, Karson debüt matçına çıxmaq üçün 2 il gözləməli oldu. Xosep Qvardiola ona ilk dəfə 2021-in mayında premyer-liqa çərçivəsində ''Nyukasl'' ilə səfər oyununda şans verdi. Həmin vaxt artıq çempionluğunu təmin edən manikunianlar 4:3 üstün olmuşdular. İkinci oyununu isə o, 2021/22-də Çempionlar Liqasının 1/8 finalında ''Sportinq''ə qarşı keçirdi. İlk görüşdə səfərdə 5:0 qalib gələn ''Siti''nin heyətində evdəki matçın 73-cü dəqiqəsində Karson Edersonu əvəzləmişdi.

Karson bir dönəm Türkiyədə də oynamağa macal tapmışdı. O, 2011-13-cü illərdə ''Bursaspor''un şərəfini qorumuş və bu klubda 77 rəsmi oyun keçirmişdi.

Bu klublardan başqa Karson ''Liverpul'', ''Lids'', ''Aston Villa'', ''Uiqan'', ''Vest Bromviç'', ''Derbi'', eləcə də İngiltərə yığmasının şərəfini qoruyub.