İngiltərə klubları arasında aparılan danışıqlar sona çatıb. “Mançester Siti”nin hücumçusu Qabriel Jezusun “Arsenal”a keçidi praktiki olaraq reallaşıb.

Yerli mənbələrin xəbərinə görə, braziliyalı artıq London klubu üçün tibbi müayinədən uğurla keçib. “Topçular”ın “şəhərlilər”ə 45 milyon funt sterlinq ödəyəcəyi və 25 yaşlı futbolçu ila 5 illik müqavilə imzalanacağı bildirilib. Qabriel Jezus MS-yə 2017-ci ildə “Palmeyras”dan transfer olunmuşdu. O, son mövsümdə “şəhərlilər”in heyətində bütün turnirlərdə 41 matçda iştirak edib, 13 qol vurub və 12 məhsuldar ötürmə edib.

Fernandinyonun da yeni klubu məlum olub. Mövsümün sonunda MS-dən azad agent kimi ayrılan təcrübəli futbolçu vətəninə qayıdıb. 37 yaşlı yarımmüdafiəçi karyerasını futbolçu kimi yetişdiyi və ilk peşəkar klubu olan “Atletiko Paranaense”də davam etdirəcək. O, Braziliya klubu ilə 2,5 illik müddətə anlaşıb. Xatırladaq ki, Fernandinyo MS-yə 2013-cü ilin yayında 40 milyon avroya “Şaxtyor”dan keçib. Onun Ukrayna klubuna 2005-ci ildə məhz “Atletiko Paranaense”dən transfer olunduğunu və bu komandada 3 il oynadığını da yada salaq.

Skott Karson isə İngiltərə klubundan aldığı yeni təklifi qəbul edib. O, “Siti” ilə yeni müqavilə imzalayıb. 36 yaşlı qapıçı İngiltərə klubunda 2019-cu ildən çıxış edir. O, ötən üç ildə komandanın qapısını yalnız iki oyunda qoruyub: 2021-ci ildə premyer-liqada “Nyukasl”a (4:3), bu il isə Çempionlar Liqasında “Sportinq”ə (0:0) qarşı oyunlarda şans qazanıb.
“Mançester Siti” heyətinə yeni futbolçu da qatıb. İngiltərə çempionu “Arminiya” ilə müqaviləsinin müddəti başa çatan Ştefan Orteqanı transfer edib. 29 yaşlı qapıçı yeni klubu ilə müddəti 2025-ci ilin yayına qədər nəzərdə tutulan müqavilə imzalayıb. Keçidin yaxında rəsmən açıqlanacağı gözlənilir. Orteqa son mövsüm bundesliqada 33 matçda iştirak edib.
Erlinq Holann və Xulian Alvares kimi bombardirləri transfer edən MS-yə daha bir yeni oyunçu gələcək. “Lids”in yarımmüdafiəçisi Kelvin Fillipsin transfer şərtləri ilə bağlı razılıq əldə edilib. “Mirror” qəzeti 26 yaşlı futbolçunun transferi üçün təxminən 52 milyon avro təzminat ödəniləcəyini xəbər verib. Bu mənbəyə görə, baş məşqçi Xosep Qvardiola Fillipsi klubdan ayrılan Fernandinyonun xələfi kimi görür. Kelvin son mövsümdə “Lids”in heyətində meydana çıxdığı 23 oyunda 1 qol vurub və 1 qolun ötürməsini verib.