Yığmamız bu gün ardıcıl 10-cu oyununda qələbə qazanmaya bilər.

Üç gün əvvəl reytinqdə bizdən aşağıda olan Latviya millisinə qarşı oynadıq. Demək olar ki, ikinci heyətlə oynayan rəqibin qapısına yol tapa bilmədik. Mahir Emreli Avropa klublarını özünə aşiq edir, yığmaya gələndə ayağı əsir. Emin Mahmudov isə sanki Qurban Qurbanovu ötməmək üçün “əlindən gələni edir”. Emini nə vaxt dayaq yarımmüdafiəçisi mövqeyində gördüyümü xatırlamıram. Latviyaya qarşı isə ən dərindən oynadı.

Ümumiyyətlə, Fernando Santuş hələ də dəqiqləşdirməyib ki, milli komanda hansı taktiki sxemlə, hansı rəqibə qarşı necə oynamalıdı. Sağ cinahda Toral, sol cinahda da Elvin çağrılan futbolçulara əsasən ideal variantdı. Lakin bu faktdı ki, Cəfərquliyev 3-5-2 taktiki sxeminə uyğun gəlmir.

Macarıstana qarşı da dördlü müdafiə ilə oynamaq ən uyğun seçim olardı. Sol Elvin, sağ Toral, mərkəzdə də Bəhlul, Elvin, ya da Cəlal. Yarımmüdafiədə seçimlər çoxdu. Amma Emin Mahmudov mütləq öz işini - hücuma top daşımağı görsün. Heyətdə nə qədər futbolçu olsa da, yığmanın durumu “Neftçi”yə bənzəyir, yəni Emin Mahmudovdan asılıdı.

Hücum xəttimiz isə dostu qorxu, düşmənə güvən verir. Xəyalla Mahirdən başqa nəsə edə biləcək kimsə yoxdu. Mahirin oyunu millidə alınmır. Xəyal isə Latviya ilə oyunda sonradan meydana çıxsa da, yaxşı oyun göstərdi. Nərimanın əvəzinə Xəyalın oynaması daha məqsədəuyğundu.

MÜZƏFFƏR QULUZADƏ