Məlum olduğu kimi İspaniya ilə Portuqaliyanın üz-üzə gəldiyi və 2:2-lik bərabərliklə yekunlaşan Millətlər Liqasının finalının taleyi penaltilər seriyasında həll olundu.

"Football-plus.az" xəbər verir ki, İspaniyanın heyətində Alvaro Moratanın penaltini qaçırması həlledici oldu və Portuqaliya seriyada 5:3 üstün olaraq turnirin qalibi oldu.

Morataya onsuz da ölkəsində münasibət birmənalı deyildi. Başına gələn son hadisənin ardından isə təcrübəli forvard ciddi tənqid atəşinə tutulub. Sosial şəbəkələrdə ispaniyalı futbolsevərlərin bir çoxu onu artıq yığmada görmək istəmədiklərini qeyd ediblər. Ona və hətta həyat yoldaşı Alis Kampelloya təhqir və təhdid mesajları göndərənlər də olub. Kampello öz səhifəsində ona göndərilən bir mesajı paylaşaraq ''adi bir futbol matçından bəhs etdiyimizin fərqindəyikkmi'' sözünü yazıb.

Mesajda ''həyat yoldaşını küçədə görsəm, dərhal öldürəcəm. Hara getdiyinə diqqət yetirsin. Onu yalqız buraxmayacam və izləməkdə davam edəcəm. Uşaqları da öz əllərimlə öldürəcəm. Ümid edirəm ki, heç biriniz sağ qalmayacaqsız'' kimi qorxunc sözlər yazılıb.

Yeri gəlmişkən, karyerasını ''Qalatasaray''da davam etdirən Morata oyundan sonra verdiyi açıqlamada yığma karyerasını bitirə biləcəyinə işarə vurub. O, sentyabrdakı matçlar üçün yığmanın düşərgəsinə gəlib-gəlməyəcəyini bilmədiyini deyib.