"Azərbaycanı evdə məğlub etmək çətindi" - Marko Rossi
Macarıstan yığmasının baş məşqçisi Marko Rossi sabah Bakıda yığmamızla keçirəcəkləri yoldaşlıq oyunu haqda bağlı fikirlərini bölüşüb.
"Football-plus.az" xəbər verir ki, mütəxəssis həm Macarıstanın, həm də Azərbaycanın bu matçda qalib gəlmək istədiyini vurğulayıb:
"Bu oyun İsveçlə görüşdən fərqli olacaq. Rəqib də qalib gəlmək istəyir. Son 5 matçda 2 heç-heçə ediblər. Biz isə son görüşdə İsveçə uduzmuşuq. Aydın məsələdi ki, Azərbaycan bizimlə oyunda nəticə qazanmağa çalışacaq".
O, millimizin baş məşqçisi Fernando Santuşdan da danışıb:
"Fernando Santuş həm milli, həm də klub səviyyəsində yaxşı məşqçidi. Onunla 2021-ci ildə qarşılaşdıq və uduzduq (0:3). O, güclü Portuqaliya komandası ilə çalışıb. Biz kiçik komandadan yox, Portuqaliyadan danışırıq. O, milli ilə 2016-cı ildə Avropa çempionu olub".
Baş məşqçi taktiki dəyişiklik edib-etməyəcəkləri barədə suala da cavab verib:
"Heyətdə bəzi dəyişikliklər edəcəyik. İlk "11-lik"də də dəyişikliklər olacaq. Bunu əvvəldən planlaşdırmışdıq. Yəni, bu, İsveçə məğlubiyyətə görə deyil".
Marko Rossi "6 il əvvəl Azərbaycanla qarşılaşmışdınız. O vaxtdan bəri nə dəyişib" sualını cavablandırıb:
"Çox şey dəyişib. Yeni komandanız var. Bəlkə də həmin matçda oynayan, indi heyətdə qalan bir neçə futbolçu var. Ümumilikdə komanda fərqlidi. Bakıda problemsiz 2:0 hesabı ilə qalib gəldik. Ancaq Azərbaycanı evdə məğlub etmək çətindi. Biz top komanda deyilik və heç kimə yuxarıdan aşağı baxmırıq".
O, Azərbaycanla oyunda topa sahib olmağa çalışacaqlarını deyib:
"Azərbaycan bizim DÇ-2026-nın təsnifat mərhələsindəki rəqiblərimizə güc baxımdan yaxın komandadı. Çalışacağıq ki, topa daha çox sahib olaq. Demək istəmirəm ki, oyuna biz hakim olacağıq. Yox. Amma biz İsveçlə və Türkiyə ilə əvvəlki matçlara baxdıqda görürük ki, topa kifayət qədər sahib olmuşuq. Lakin bu heç nədi. Çünki qol vurmalısan. Biz təəssüf ki, qol vura bilmədik".
Digər xəbərlər
