Mayın 18-də “Nernberq”in heyətində son oyununu keçirən və Braunşveyq “Ayntraxt”ı ilə oyunda het-trik edən Mahir Emreli həmin gündən bəri subaylığın dadını çıxarır. Sözün bütün mənalarında!

Futbolçunun heç bir klub qarşısında öhdəlikləri yoxdusa, bu da elə subaylığın bir növüdü. Artıq iyunun 8-di və Mahir hələ də özünə yeni iş yeri tapmayıb. Və belə durum şəxsən məni narahat etməyə başlayır. Mahir açıq-aşkar qərar verməkdə çətinlik çəkir. Əlbəttə, 27 yaşlı futbolçu heç bir təklif almasaydı, narahatlıq üçün daha çox əsas olardı. Amma indi fərqli durum yaranıb: məşhur hücumçumuz çoxlu təklif arasında seçim etməkdə çətinlik çəkir!

Mövsümü 10-cu yerdə bitirən “Nürnberq”i 5-7-ci yerləri bölüşən “Kayzerslautern”ə dəyişmək ilk baxışdan cəlbedici variant kimi görünür. Bu komanda Almaniyanın dördqat çempionudu, amma 2012-ci ildə elitadan gedəndən sonra heç cür ora qayıda bilmir. Odu ki, əldə 1-ci bundesliqanın autsayder klublarından belə təklif varsa, “Kayzerslautern”ə “hə” demək ideal variant deyil, hətta mənasız qərardı. Hələ mən Acun Ilıcalının sahibi olduğu “Hall Siti” variantını demirəm. “Hall Siti” hər nə qədər zəngin olsa da, son mövsümdə çempionşipdə yerini çətinliklə qorudu, Mahirin imkanlarına yaxşı bələd olan Sergey Yakiroviçin bu komandanın “sükanı arxasına” keçmək perspektivinə də aldanmağa dəyməz.

Ümumiyyətlə, mənə elə gəlir ki, İngiltərə və ya mümkün İtaliya variantını seçmək Mahir Emreli kimi potensiallı futbolçu üçün intihara bərabərdi. Həmin ölkələrdə təbliğ olunan, sevilən oyun üslubu Mahirlik deyil. Həmvətənimiz daha incə, kombinasiyalı oyun göstərən komandalarda özünü “suda balıq kimi” hiss edir, ona özünü göstərmək üçün hərəkət azadlığı, boş zonalar lazımdı. Müdafiəçilərin “ayağa oynadığı”, atletik-fiziki futbolun “at oynatdığı” ölkələrdə parlamaq, karyerasını istədiyi kimi davam etdirmək Mahir üçün çətin, çox çətin olacaq.

...Mən onu sonuncu dəfə mayın 27-də “Şeraton”da gördüm. Həmin gün taleyinin tezliklə, çox güman, elə yığmanın toplanışı vaxtı həll olunacağını dedi. 12 gün keçib, amma Mahir qərar verə, seçim edə bilmir. Təki sonda düzgün qərar versin, bir neçə gün də dözmək olar.

ORXAN