UEFA-nın Texniki Müşahidəçilər Qrupunun ümumi rəyinə əsasən, Çempionlar Liqasında (ÇL) 2024/25 mövsümünün ən yaxşı oyunçusu müəyyənləşib.

"Football-plus.az" xəbər verir ki, bu nominasiyada PSJ-nin hücumçusu Usman Dembele qalib gəlib.

Fransalı futbolçu komandasının uğurunda meydana çıxdığı 15 oyunda 8 qol vurması və 6 məhsuldar ötürmə verməsi ilə rol oynayıb. PSJ-nin ən yaxşı bombardiri olan Dembelenin əksər matçlarda lider funksiyasının öhdəsindən məharətlə gəlməsi vurğulanıb.

Liqa mərhələsinin 7-ci turunun “Mançester Siti” ilə vacib oyununda 4:2 hesablı əzmkar qələbədə pay sahibi olan 28 yaşlı futbolçu “Ştutqart”a qarşı növbəti matçda (4:1) het-trik etmiş, pley-offun “Liverpul” (1:0) və “Arsenal” (1:0) ilə səfər oyunlarında mükəmməl futbol sərgiləmişdi. Texniki Müşahidəçilər Qrupu onun “İnter” ilə finalda ön xətdə güclü pressinq etməklə rəqib müdafiəsini daim gərginlik altında qoyduğunu da qeyd edib.

ÇL-də mövsümünün ən yaxşı gənc oyunçusu da müəyyənləşib. Bu nominasiyada PSJ-nin hücumçusu Dezire Due qalib gəlib. Fransalı futbolçu mövsüm ərzində meydana çıxdığı 16 oyunda 5 qol vurub və oyundaşlarına 5 məhsuldar ötürmə verib.

ÇL-də mövsümün ən baxımlı qolunun müəllifi isə Lamin Yamal olub. “Barselona”nın hücumçusunun ilk yarımfinal matçında (3:3) “İnter”in qapısına 24-cü dəqiqədə yol tapdığı epizod azarkeşlər arasında keçirilən sorğuda daha çox səs toplayıb.