''Qalatasaray''ın sabiq ulduzu Uilfrid Zaha ilə bağlı yeni xəbər var. Təcrübəli futbolçunun faktiki olaraq artıq İstanbul nəhəngi ilə heç bir əlaqəsi qalmadı.
Zaha ''Qalatasaray''a 2023-ün yayında transfer olunmuş, bir mövsüm ərzində 42 rəsmi oyunda 10 qol, 5 məhsuldar ötürmə ilə fərqlənmişdi. Amma Türkiyəyə uyğunlaşmaqda çətinlik çəkməsi və əsas heyət üzvünə çevrilə bilməməsi üzündən onun Türkiyə macərası uzun çəkmədi. Bu mövsümün əvvəlində ''Lion''a yollanan və orda da ümidləri doğrulda bilməyən 32 yaşlı futbolçu qışda okeanın o tayına yollanaraq icarə əsasında ''Şarlott'' ilə müqavilə imzaladı. ''Qalatasaray'' bu keçiddən 2,8 milyon dollar qazandı.

Bundan başqa Zaha ''sarı-qırmızılar''ın ona olan 2 milyon 376 min avroluq borcdan da imtina etdi. Türkiyə çempionu MLS təmsilçisi ilə müqaviləyə xüsusi maddə saldırmışdı.

Belə ki, Zaha MLS-də normal mövsümdə ən azı 15 oyuna çıxacağı təqdirdə onun ''Şarlott'' ilə müqaviləsi avtomatik olaraq 2026-nın iyununa qədər uzanacaqdı. Dünən ''Şarlott''un səfərdə ''Toronto''nu məğlub etdiyi görüşdə Zaha məhz mövsümdəki 15-ci oyunu keçirdi və müqavilədəki maddə qüvvəyə mindi. İcarə müqaviləsinin avtomatik birillik yenilənməsi ilə ''Qalatasaray'' əlavə 1,3 milyon dollar qazanmış oldu. Eləcə də Zahaya ödənilməli olan 800 min avro da klubun büdcəsində qalacaq.

Zahanın ''Qalatasaray''la müqaviləsi məhz 2026-nın iyununa qədər nəzərdə tutulmuşdu. Bu da o deməkdi ki, bu futbolçunun Türkiyə çempionu ilə artıq heç bir əlaqəsi qalmadı.