Zaha MLS-də də azarkeşlərlə yola getmir
Uilfrid Zaha karyerasının çətin dönəmlərini yaşamaqda davam edir.
"Football-plus.az'' xəbər verir ki, təcrübəli futbolçu İngiltərədən ayrıldıqdan sonra hələ ki, heç bir klubda ümidləri doğrultmur. ''Qalatasaray'' karyerası cəmi bir il çəkən, bu mövsümün əvvəlində icarə əsasında ''Lion''a transfer olunan, amma qışda ABŞ təmsilçisi ''Şarlott''a keçməyə üstünlük verən Zaha yenə futboldankənar olaylarla diqqət mərkəzindədi.
Fransada həm fanatlar, həm də baş məşqçi ilə yola getməyən 32 yaşlı vinger Amerikada da buna bənzər problemlər yaşayır. Son turda ''Şarlott''un evdə ''Nyu İnqlend''ə minimal hesablı məğlubiyyətinin ardından Zahanın fanatlarla arası dəyib. O, öz səhifəsində bununla bağlı etdiyi paylaşımda narazılığını bu sözlərlə dilə gətirib:
''Həmişəki kimi komanda uduzursa, günahkar Zaha olur. Dribblinq edəndə paxıl oluram. Sadə oynayanda mənə görə ödənilən pulun qarşılığını vermirəm. Zərbə vuranda ötürmə verməliydim, ötürmə verəndə zərbə vurmalı idim... Bütün fürsətləri də qola çevirməli idim... Adətən belə axmaq şeylərə cavab vermirəm. Amma artıq ''qurbanlıq qoyun'' olmaq istəmirəm. ''Zaha elədi'', ''Zaha belədi'' deyirsiz, amma komanda tarixinin ən yaxşı startını reallaşdırmışdı. Hətta liderliyə də yüksəlmişdik. Artıq məndən əl çəkin''.
Qeyd edək ki, yanvarda ''Lion''la icarə müqaviləsini qarşılıqlı şəkildə ləğv edən, eləcə də ''Qalatasaray''dan almalı olduğu 2,3 milyon avrodan imtina edən Zaha icarə əsasında ''Şarlott''la birillik müqavilə imzaladı. O, indiyə qədər bu klubda forma geydiyi 8 qarşılaşmada 2 qol vurub. Şərq konfransında mübarizə aparan ''Şarlott'' 10 oyuna topladığı 19 xalla 4-cü pillədə qərarlaşıb.
