Mayın 31-də ölkə kubokunun finalı çərçivəsində “Qarabağ” - “Sabah” matçı keçiriləcək.

“Football-plus.az” xəbər verir ki, “Sabah”ın baş məşqçisi Vasili Berezutski oyunöncəsi mətbuat konfransında jurnalistlərin suallarını cavablayıb.

- Qarşıda bizi maraqlı oyun gözləyir. İlk dəfədi finaldayıq. Heç-heçə deyə bir şey yoxdu. Ya qələbə, ya məğlubiyyət!

- Kuboka necə hazırlaşırsız? Heyətdə hansısa problemlər var?
- Seymur Məmmədov zədəlidi. Qalan hər kəs düşərgədədi. Oyunun əhəmiyyətini bilirik. Bir aydı ki, bu matça hazırlaşırıq. Hər şey qaydasındadı. 

- Uğursuz nəticə olacağı təqdirdə, komandadan göndəriləcəyiniz iddia edilir. Hətta namizəd də bəllidi. Vacib oyunöncəsi bu xəbərlər sizə necə təsir edir?
- Bu, bizə heç bir təsir etmir. Hamımız kuboka köklənmişik. Bunları kubokun finalından sonra danışmaq olar. Düzü, mən mətbuatı oxumuram. Bu cür xəbərlər də mənə təsir etmir.  

- Kubokun finalında uğursuz olsaz, komandadan gedəcəksiz, yoxsa rəhbərliyin sizi göndərməsini gözləyəcəksiz?
- Bu barədə danışmaq üçün hələ tezdi. Təyin olunandan bir həftə sonra istefaya getməliydim (gülür). Finalı gözləyək, sonra danışarıq.

- Dəfələrlə futbolçu kimi Rusiya kubokunun finalında oynamısız, qazanmısız. Final oyununun özəlliyini nədə görürsüz?
- Futbolçu və məşqçi kimi eyni hissləri keçirirəm. Öz gücünü meydanda göstərməlisən. Qələbə üçün əlindən gələni etməlisən.

- "Sabah"a gəldikdən sonra "Qarabağ"a uduzmamısız. Bunu finalöncəsi psixoloji üstünlük sayırsız?
- Bunu üstünlük və ya zəiflik saymaq olar. "Qarabağ" da motivasiyalı olacaq. Onlar üçün də önəmlidi. Şanslar 50/50-di. "Qarabağ" favorit sayılır. Güllə açılmamış yıxılmaq lazım deyil.

- Leonid Slutski ilə birlikdə uzun müddət işləmisiz. O da təcrübəli və sizə yaxın biridi. Maraqlıdı, "Qarabağ"ı necə məğlub etmək barədə onunla söhbətiniz olub?
- Deyə bilərəm ki, yox. Amma ümumi məqamlar var ki, məşqçilər olaraq aramızda müzakirə edirik. Fərdi olaraq bir şey yoxdu ki, məhz bununla rəqibə qalib gələ bilərik. 

- "Qarabağ"a qalib gəlib avrokuboklara vəsiqə qazansanız, heyəti qoruyub-saxlayacaqsız?
- Oyuna iki gün qalıb. Hazırda oyunla yaşayırıq. Gələcəkdə necə olacağını bilmirəm. Qalib də gələ bilərik, uduza da. Necə olacağını finalda görəcəyik.

“Sabah”ın futbolçusu Pavol Şafranko da mətbuat konfransında iştirak edib.

- Bizi çox böyük oyun gözləyir. Hər iki komanda üçün maraqlı oyun olacaq. İlk dəfə finalda oynayacağıq. Hər kəsə söz verirəm, əlimizdən gələni dəcəyik ki, kuboka sahib çıxaq. Hamı oyundan həzz alacaq.

- Beş ölkədə legioner həyatı yaşamısan, onlardan ikisində titul qazanmısan. Azərbaycan Kubokunu qazanmaq sənin üçün daha önəmli sayıla bilər?
- Hər titul önəmlidi. Yaş ötdükcə bunu hiss edirsən. Bütün titullar mənim üçün eynidi.

MÜZƏFFƏR QULUZADƏ