"Traktor"un çempion olması inanılmaz uğurdu. Bu komandanın bənzərsiz olduğunu düşünürəm. Kollektivdə çalışan xorvatiyalı mütəxəssislər və futbolçular çox böyük iş gördülər. Bildiyimə görə, burda məşqçilər korpusunun illik gəliri 2-2,5 milyon avro aralığındadı. Futbolçular isə təxminən 1 milyon avro maaş alır. Onlar hər xala görə böyük məbləğdə mükafat alıblar. Ancaq çempionluğu məhz maliyyə məsələləriylə əlaqələndirib komandaya haqsızlıq etmək istəmirəm. "Traktor" Təbrizin komandasıdı. Bu ərazidə azərbaycanlılar məskunlaşıb. Onlar kollektivin ev oyunlarında əsl futbol şousu göstərirlər. Tribunalarda həm keyfiyyət, həm də kəmiyyət baxımından tükürpədici mənzərə olur. "Traktor"un 2020-ci ildə Asiyanın ən populyar klubu seçilməsi, indiyə qədər üç dəfə mövsümü ikinci pillədə tamamlaması, Skoçiç kimi ambisiyalara, ən önəmlisi qələbə zehniyyətinə sahib mütəxəssis tərəfindən idarə edilməsi çempionluğun uzaqda olmadığının işarəsi idi. Əminəm ki, "Persepolis" və "İstiqlal" "Traktor"un yüksəlişindən narahatdı. Köməkçilərimdən olan iranlı məşqçi də bunu etiraf edir".