AL-in finalçıları ÇL-in finalçısından daha dəyərli heyətə malikdi

Bu gün Avropa Liqasında 2024/25 mövsümünün qalibi bəlli olacaq. İspaniyanın Bilbao şəhərində yerləşən ''San Mames'' stadionunda İngiltərənin iki nəhəngi - ''Tottenhem'' ilə ''Mançester Yunayted'' üz-üzə gələcək.

Finaldan öncə ən diqqətçəkən məqam bu klubların heyətinin dəyəridi. Onların ikisinin birlikdə dəyəri 1 milyard 535 milyon avrodu! Belə ki, ''Tottenhem'' 836,1 milyon avro, ''Yunayted'' isə 699,25 milyon avro dəyərə malikdi. Onların hər ikisi dünyanın ən dəyərli klubların ilk ''10-luğ''unda qərarlaşıb.

Müqayisə üçün bildirək ki, Çempionlar Liqasının finalçısı ''İnter'' 663,8 milyon avroluq dəyəri ilə bu siyahıda yalnız 11-ci pillədə qərarlaşıb. İsveçli vinger Deyan Kulusevski 60 milyon avro dəyəri ilə ''Tottenhem''in, Leri Yoro, Kobbi Mainoo və Bruno Fernandeş isə 55 milyon avroluq dəyəri ilə ''Yunayted''in ən bahalı futbolçuları statusundadı.