Bakıda dünən nostalji dolu bir futbol axşamına şahidlik etdi.

Minifutbol üzrə dünya çempionatına həsr olunan “Legends Cup” çərçivəsində Azərbaycan futbolunun əfsanələri meydanda bir araya gəldi. “Neftçi 2000-lər” və “Premyer-liqa məşqçiləri” arasında keçirilən qarşılaşma təkcə futbol yox, həm də tribunaların mübarizəsi ilə yadda qaldı.

Milli Gimnastika Arenasında keçirilən bu maraqlı görüşdə “Neftçi 2000-lər” komandasının “sükanı arxasında” təcrübəli Ağasəlim Mircavadov dururdu. Meydana çıxan adlar isə azərbaycanlı futbolsevərlərin qəlbində əbədi yer tutmuş isimlər idi: Rəşad Sadiqov, Zaur Tağızadə, Tərlan Əhmədov, Vidadi Rzayev, Mahir Şükürov və başqaları.

“Premyer-liqa məşqçiləri”nin başında türkmən taktiki beyni Kurban Berdıyev dayanırdı. Qurban Qurbanov, Vaqif Cavadov, Əfran İsmayılov, Yunis Hüseynov və digər tanınmış adlardan qurulmuş bu komanda penalti seriyasında 3:2 hesabı ilə qalib gəldi. Hesabı Əfran İsmayılov açdı, Rəşad Sadiqov isə cavab qolu ilə oyuna tarazlıq gətirdi.

Bu oyunda daha bir gözəl mənzərə gördük. Bəli, “Forza Neftçi” azarkeş qrupu bir daha sübut etdi ki, Azərbaycan tribunalarının atmosferini formalaşdıran əsas gücdü. Ən maraqlısı isə odu ki, bu dəfə qarşılarında azarkeş sayı və coşqusu ilə tanınan “Qarabağ Ordu” vardı. Milli Gimnastika Arenasının tribunalarında “Forza Neftçi”nin dalğası hər tərəfi bürümüşdü. “Qarabağ Ordu” bu qarşısıalınmaz dalğanın altında boğuldu.

Qeyd edək ki, “Forza Neftçi” bu matça xüsusi hazırlaşmışdı. Fanklub sosial şəbəkələrdə yaydıqları posterlərdə hər kəsi bu nostalji dolu oyuna dəvət etmişdi. Nəticə də göz qabağındadı.

ƏSƏD SEYİDOV